Oralda taǵy bir provızorlyq statsıonar ashyldy
ORAL. QazAqparat – BQO kópbeıindi aýrýhanasy bazasynda 150 orynǵa eseptelgen provızorlyq statsıonar ashyldy, dep habarlaıdy QazAqparat tilshisi.
Aýrýhana dırektory Arman Baıdeýovtiń aıtýynsha, statsıonar jýyrda salynǵan №2 korpýsta ornalasqan.
Provızorlyq statsıonarda qarqyndy terapııa palatalary, arnaıy monıtorlar, 21 ókpeni jasandy jeldetý apparaty, kólemi 7 jáne 8 lıtr bolatyn Bobrov apparattary engizilgen 40-tan astam ottegi kontsentratorlary bar.
«Bul kontsentratorlardyń ereksheligi, ottegini óndirý jáne ókpeni jasandy jeldetý apparatyna qosylý arqyly patsıentti ár túrli paıyzdyq mólsherde ottegimen qamtamasyz ete alady», deıdi A.Baıdeýov.
Munda tamaqtaný men emdeý júıesi tolyǵymen ońtaılandyrylǵan, qajetti dárethana bar jáne sýmen úzdiksiz qamtylǵan.
Naýqastarǵa barlyq jaǵdaı jasalǵan jańa korpýsta alǵashqy emdelýshiler qabyldana bastady.
«Qazirgi tańda qaýipti indetpen el bolyp kúresýdemiz. Osy oraıda aýrýhanalarǵa kómek qolyn sozyp jatqan jandardyń bárine alǵysymyzdy aıtqymyz keledi», dedi A.Baıdeýov.
Eske sala keteıik, budan buryn Oral qalasynyń emhanalary qashyqtan jumys isteýge kóshkenin jazǵan bolatynbyz.
