Oralda taǵy bir mektep qaıta salynbaq
ORAL. QazAqparat - Oral qalasynda №31 mektep ǵımaraty qaıta salynbaq, dep habarlaıdy «QazAqparat» tilshisi.
Oblystyq qurylys basqarmasynan túsken málimetke qaraǵanda, apatty jaǵdaıdaǵy mektep úıi súrilip tastalyp, ornyna 400 oryndyq jańa ǵımarat salynbaqshy. Qazirgi kezde onyń jobalyq-smetalyq qujattamasyn jasaý úshin oblystyq bıýdjetten 18 mln teńge bólindi. Jańa mektep qurylysy 2019 jyly bastalmaqshy.
Qazir bilim ordasynda 400-deı bala oqıdy. Olar jańa ǵımarat salynǵan kezde basqa mektepte bilim ala turatyn bolady.
Oralda budan buryn apatty jaǵdaıdaǵy №4 orta mektep ǵımaraty súrilip tastalyp, ornyna jańasy salynyp, ótken jyl sońynda paıdalanýǵa berilgen bolatyn. №4 jalpy orta jáne qosymsha bilim berý mektep-ortalyǵynyń dırektory Máýlen Dilmaǵambetovtiń sózine qaraǵanda, 8 qańtar kúni balalar úshinshi toqsandy jańa ǵımaratta bastaıdy. Munda 333 oqýshy bilim alady.
Aıta keteıik, bıyl oblys boıynsha 4 jańa mektep qurylysy márege jetpekshi.
