Oralda taǵy bir mektep iske qosyldy
ORAL. QazAqparat - Búgin Oralda 600 oryndyq №48 mektep paıdalanýǵa berildi, dep habarlaıdy QazAqparat tilshisi.
Derkól kentindegi jańa bilim oshaǵynyń ashylý rásimine qatysqan oblys ákimi Altaı Kólginovtiń atap ótkenindeı, atalmysh mektep Elbasynyń «Nurly jol» baǵdarlamasy aıasynda boı kóterdi. Bul - Oralda jyl basynan beri iske qosylǵan ekinshi mektep. 
«Memleket basshysy tarapynan bilim salasyna udaıy kóńil bólinip keledi. Tek bizdiń óńirdi aıtqannyń ózinde, sońǵy úsh jylda bilim bıýdjeti 20 mlrd teńgege artty. 2015 jyly 47 mlrd teńge bolsa, 2016 jyly 57 mlrd, ótken jyly 65 mlrd teńgege jetti. Bıylǵy jylǵa da joba-josparlarymyz barshylyq. Basty maqsat - bilimdi urpaq tárbıeleý. Aldaǵy ýaqytta Oral qalasy ǵana emes, Bókeı ordasy, Zelenov, Aqjaıyq, Terekti aýdandarynda da jańa mektepter ashylady. Sonymen qatar jańartylǵan bilim mazmunyna kóshken muǵalimderdiń eńbekaqysy kóbeıtilip, bilim sapasyn jaqsartý baǵytyndaǵy jumystar jalǵasa beretin bolady», dedi óńir basshysy. 
Aıta keteıik, 2016 jyldyń qarasha aıynda qurylysy bastalǵan atalmysh nysanǵa 1255,6 mln astam teńge bólingen edi. Buryn osy «Kókjıek» shaǵynaýdanyndaǵy balalar №12 mektepte oqyp kelse, endi ishi-syrty kelisken zamanaýı ǵımaratta bilim almaq. 
Jańa mektepke 500 shákirt, shaǵyn ortalyqqa 100 búldirshin qabyldanbaq. Jalpy aýmaǵy 8,5 myń sharshy metr ǵımaratta 56 kabınet, kitaphana, qos sheberhana, sport zaly, 200 oryndyq májilis zaly, radıotorap kabıneti, 130 oryndyq ashana bar.
