Oralda taǵy bir kóp qabatty úı paıdalanýǵa berildi
ORAL. QazAqparat - Búgin Oralda 9 qabatty turǵyn úı paıdalanýǵa berildi, dep habarlaıdy «QazAqparat» tilshisi.
Turǵyndardy Jańa jyl merekesimen quttyqtap, páter ıelerine kiltterin tabys etken oblys ákimi Altaı Kólginovtiń atap ótkenindeı, Elbasy Nursultan Nazarbaevtyń bastamasymen qolǵa alynǵan «Nurly jer» baǵdarlamasy aıasynda taǵy bir kóp qabatty úı iske qosylyp, búgin qalada 156 otbasy baspanaly bolyp otyr. «Nurly jer» memlekettik baǵdarlamasyna sáıkes bıyl óńirde 115 myń sharshy metr turǵyn úı boı kóterdi. Barlyq qarjy kózderinen 380 myń sharshy metr turǵyn úı salyndy, bul ótken jylǵydan 80 paıyzǵa kóp.
Jańa ǵımaratty «Otdelstroı» qurylys-kommertsııalyq fırmasy» JShS (basshysy Valentına Mıhno) ýaqtyly salyp bitirse, páterler «Qazaqstannyń turǵyn úı qurylys jınaq banki» AQ (oblystyq fılıal dırektory Aıgúl Naýryzálıeva) salymshylaryna berilip otyr.
«Alty-jeti jyl buryn Zachagan kentindegi osynaý aýmaq bos jatqan jer bolatyn. Qazir munda tutas qalashyq paıda boldy. Ony kórkeıtý, abattandyrý jumystary budan keıin de jalǵasatyn bolady», dedi Altaı Kólginov.
