Oralda taǵy bir búldirshin terezeden qulap ketti
BQO tótenshe jaǵdaılar departamentiniń baspasóz qyzmetinen túsken málimetke qaraǵanda, oqıǵa búgin saǵat 09:54-te 5-shaǵyn aýdandaǵy bes qabatty úıde boldy.
«Ata-anasynyń qaraýynsyz qalǵan tórt jasar ul bala ekinshi qabat terezesinen qulap, aýrýhanaǵa jatqyzyldy. Aldyn ala málimet boıynsha jaǵdaıy ortasha, jabyq bas-mı jaraqatyn alyp, mıy shaıqalǵan. Mańdaı tusy kógerip, sol jambasy synǵan. Іshinen jabyq jaraqat alǵan. Oqıǵa ornyna jedel járdem brıgadasy (3 adam, 1 tehnıka) bardy», - dep habarlady departamentten.
Bul – keıingi eki kúndegi ekinshi oqıǵa.
Eske sala keteıik, Oralda úshinshi qabat terezesinen qulap ketken 5 jasar balanyń aýrýhanaǵa jatqyzylǵanyn jazǵan bolatynbyz.
BQO densaýlyq saqtaý basqarmasynyń baspasóz hatshysy Aınagúl Saqposynovanyń naqtylaýynsha, keshegi balanyń jaǵdaıy turaqty. Iyq súıegi synǵan, bas pen mıdyń jabyq jaraqatyn alyp, mıy shaıqalǵan.
«Búgin terezeden qulaǵan bala tekseristen ótip jatyr. Onyń da jaǵdaıy turaqty», - dedi A. Saqposynova.
