Oralda synyptastarynan álimjettik kórgen oqýshy máselesi qaralýda
ORAL. QazAqparat – Oralda oqýshynyń synyptastarynan álimjettik kórý oqıǵasy tekserilip jatyr, dep habarlaıdy QazAqparat tilshisi.
Oqıǵa Oralǵa qarasty Krýgloozernyı kentinde bolǵan.
Balanyń anasy Altyn Ahmedııarovanyń aıtýynsha, Krýgloozernyı orta mektebinde oqıtyn ulyna synyptastary uzaq ýaqyt boıy álimjettik kórsetip kelgen.
Aqsha suraý máselesi 2018 jyly bastalyp, bastapqyda balalarynyń qatysýymen ákeler jınalysy bolyp, ózara kelisip, ony jaýyp tastaǵan.
Bir top bala ulynan únemi aqsha alyp, joq bolsa, soqqyǵa jyǵyp otyrǵan.
Keıin synyptastary kelip, balasynyń aqshasyn qaıtaratynyn aıtyp, anasyna polıtsııaǵa aryz jazbaýyn ótingen.
«Jerge túsip ketken kúrtemdi alyp ber deıdi bireýi. Meniń balam ony túsirgen men emes, alyp bermeımin dep jaýap bergen. Tazalap ber dep te talap qoıǵan. Sabaqtan keıin eki bala muny dúken janynan kútip alyp, bireýi soqqyǵa jyǵyp, tórt qabyrǵasyn syndyrǵan. Eń soraqysy, balamdy bireý malǵa teńep, satylady dep sýretin áleýmettik jelige júktegen. Qazir sol mektep oqýshylary birinen biri kórip, taba almaı jatyr. Meniń talabym – munyń da kim ekenin anyqtap, jazalasyn deımin, sóıtip bul oqıǵa basqalarǵa sabaq bolsyn», - dedi A.Ahmedııarova.
BQO polıtsııa departamentinde ótken brıfıngte Shaǵan polıtsııa bóliminiń bastyǵy Tımýr Aıtýǵanovtyń málim etkenindeı, ótken jylǵy qyrkúıekte bir synypta oqıtyn 2004 jáne 2003 jylǵy balalar dúken janynda sózge kelip, tóbelesip qalǵan.
Sonyń saldarynan 2004 jylǵy jasóspirimniń qabyrǵalary synyp, orta dárejedegi dene jaraqatyn alǵan. Soǵan baılanysty balanyń anasy Shaǵan polıtsııa bólimine júgingen. Qazirgi kezde QR QK 107-babyna sáıkes tergeý amaldary júrgizilýde. Birneshe saraptama taǵaıyndaldy.
Ekinshi oqıǵa boıynsha balanyń anasy 27 qańtar kúni aryzdanǵan. QR QK 274-babyna sáıkes qylmystyq is qozǵaldy. Balanyń sýretin áleýmettik jelige kim salǵany jóninde jedel anyqtaý jumystary júrgizilýde.
BQO bilim basqarmasynan túsken málimetke qaraǵanda, atalǵan másele mektep dırektory janyndaǵy keńeste ata-analar men oqýshylar, ishki ister organdary qyzmetkerleriniń qatysýymen qaraldy.
Synyp jetekshisi, dırektordyń tárbıe isi jónindegi orynbasaryna qatysty tártiptik sharalar alyndy.
