Oralda sý tasqyny kezinde salynǵan qum toly qapshyqtar jınalyp jatyr

ORAL. KAZINFORM — Oral qalasynda sý tasqyny kezinde salynǵan bóget úıindilerin jınaý, aýmaqty retke keltirý jumysy júrgizilip jatyr.

Oral qalasy ákimdiginen málim etkendeı, qazirgi kezde Shaǵan ózeni boıyndaǵy bóget úıindileri, qum salynǵan qapshyqtar jınalýda. 

«Buǵan aýmaqtyq qorǵanys qyzmetkerleri jumyldyryldy. Atalǵan jumysqa kún saıyn 10 arnaıy tehnıka tartylǵan. Aldaǵy ýaqytta qalanyń ózge de aýdandarynda osyndaı tazalyq jumysy júrgizilmek» dep habarlady vedomstvodan.

Qalada kúni búgin sý basqan saıajaı úılerin tehnıkalyq tekserýden ótkizý, múliktik baǵalaý jumystary jalǵasyp jatyr. 

Oraldaǵy evakýatsııa pýnkterinde 2 myńdaı adam turyp jatyr.

BQO TJ departamentiniń baspasóz qyzmetinen túsken málimetke qaraǵanda, saıajaıdan sý sorý jumystary táýlik boıy júrgizilýde.

Eske sala keteıik, budan buryn Oralda sýǵa ketken 2600-den astam turǵyn úıge tehnıkalyq tekserý jumystary júrgizilgenin jazǵan bolatynbyz.