Oralda sýretshi, kompozıtor Qýandyq Mádirdiń shyǵarmashylyq keshi ótti
ORAL. QazAqparat - Qadyr Myrza Áli atyndaǵy mádenıet jáne óner ortalyǵynda Qazaqstan sýretshileri jáne Eýrazııalyq dızaınerler odaǵynyń múshesi, halyqaralyq jáne respýblıkalyq baıqaýlardyń laýreaty, QR mádenıet salasynyń úzdigi, sýretshi-kompozıtor Qýandyq Mádirdiń «Júregim - sezim aılaǵy...» atty shyǵarmashylyq keshi ótti, dep habarlaıdy «QazAqparat» HAA tilshisi.
Kesh barysynda Qýandyq Mádir kórermender saýaldaryna jaýap bere otyryp, óziniń ómirdegi jáne ónerdegi joly, ustazdary men shákirtteri, tabys-jetistikteri týraly syr shertti. 1965 jyly Atyraý oblysy Qurmanǵazy aýdanynda qazaqtyń uly aqyndarynyń biri Jumeken týǵan topyraqta dúnıege kelgen Qýandyq 1990 jyly Oral pedagogıkalyq ınstıtýtynyń (qazirgi M.Ótemisov atyndaǵy Batys Qazaqstan memlekettik ýnıversıteti) kórkemsýret-grafıka fakýltetin bitirgennen keıin shırek ǵasyr boıy osy oqý ornynda ustazdyq etip keledi. Toqsanynshy jyldardyń basynda án jazýdy bastaǵan ol boıyndaǵy birneshe ónerdi qatar alyp júr. 1997 jyly qurylǵan «Óner» qoǵamdyq qoryna jetekshilik etetin Qýandyq Mádir án jazyp, sýret salýmen aınalysyp qana qoımaı, óńirdiń qoǵamdyq-saıası ómirine belsene aralasýdy daǵdyǵa aınaldyrǵan. Ásirese, Qazaqstannyń batys aımaǵy men Reseıdiń kórshiles oblystarynda turatyn sýretshilerdiń basyn qosyp, birneshe ret halyqaralyq baıqaý uıymdastyrdy. Batys Qazaqstan oblysy sýretshileriniń «Jazıra Jaıyq» atty tuńǵysh albomyn qurastyryp, baspadan shyǵardy.
Qýandyq Mádirdiń ánderin Qazaqstannyń eńbek sińirgen ártisi Qanatqalı Qojaqov, halyqaralyq jáne respýblıkalyq baıqaýlardyń laýreattary Marat Sarbópeev, Erkin Ótegenov jáne basqalar áýelete shyrqady. Elge belgili ádebıetshi-ǵalym Serikqalı Sharabasovqa arnalǵan «Jaıyqta Sharabasov bireý ǵana» atty jańa áni alǵash ret oryndaldy. Sondaı-aq avtor óziniń óleńderin de oqyp berdi.
Keshte kóp jyl oblystyq qazaq drama teatryn basqarǵan eńbek ardageri Qujyrǵalı Tóleýishev, «Edil-Jaıyq qazaqtary» qaýymdastyǵynyń tóraǵasy Amanjol Zınýllın, M.Ótemisov atyndaǵy BQMÝ mádenıet jáne óner fakýltetiniń dekany Meıram Isataev jáne basqalar Q.Mádirdiń segiz qyrly, bir syrly óner ıesi ekendigine toqtalyp, aldaǵy ýaqytta da tabys bıigine kóterile berýine tilektestigin bildirdi.
Qadyr ortalyǵynyń dırektory Baýyrjan Halıolla «Qadyr jolymen...» atty joba aıasynda aqyn-jazýshylarmen, óner qaıratkerlerimen kezdesýlerdiń jańa jylda da jalǵasatynyn jetkizip, Q.Mádirge oblystyq mádenıet, muraǵattar jáne qujattama basqarmasynyń basshysy Dáýletkereı Qusaıynovtyń alǵys hatyn tabys etti.
