Oralda sýǵa ketken saıajaı úıleri tehnıkalyq tekserýden qalaı ótkizilip jatyr
ORAL. KAZINFORM – Oral qalasynda sýǵa ketken saıajaı úıleri tehnıkalyq tekserýden ótkizilip jatyr.
«Samal-3» shaǵynaýdanynda «Bırıýsa» baý-baqsha seriktestigi 23-mekenjaıda turatyn Vıktor Kıverovtiń málim etkenindeı, úıine sý eki ret kirgen.
«Aldymen 2 sáýir kúni úıde jarty metrdeı sý boldy. Birneshe kúnnen keıin qarǵyn sý taǵy basty. Aýlamyz áli sýda tur. 2017 jyly bastap, óz kúshimizben turǵyzyp edik. Ótken jyly kirgenbiz. Asúı jıhazy jeltoqsan aıynda jańadan alynǵan. Múlikterimiz de sýǵa ketti. 100 AEK kóleminde birjolǵy áleýmettik kómek aldyq. Basqa baspanamyz joq bolǵandyqtan, tehnıkalyq tekserýden ótkennen keıin jóndeý júrgizbekshimiz», -deıdi V.Kıverov.
Atalmysh mekenjaıǵa tehnıkalyq tekserý júrgizgen «Daýymshar» JShS sarapshysy Meırambek Idresovtiń aıtýynsha, úı turýǵa jaramdy.
«Іrgetasynda jaryqshaq joq, qabyrǵalary jaqsy jaǵdaıda. Tek eden, tusqaǵaz, esikterine zalal kelgen. Jumysymyzdyń qorytyndysyn beremiz, sol boıynsha baǵalaýshylar saraptama jasap, komıssııa sheshim shyǵarady. Barlyǵy 70 úı ıesinen ótinish tústi, sonyń 9-yn qarap úlgerdik. Ár úıge tehnıkalyq tekserý júrgizýge 40 myń teńge bólinedi», -dedi M.Idresov.
«Veteran» baý-baqsha seriktestigi 112-mekenjaıynda ornalasqan qos qabatty úı de turýǵa jaramdy bolyp shyqty. Úı ıesi Roman Kondratskıı osynda zaıyby jáne eki balasymen turatynyn jetkizdi.
«Tehnıkalyq tekserý júrgizgen kompanııalar tizim beredi. Biz sol tizim boıynsha jóndeýge jáne múlikke baılanysty baǵalaý jumystaryn júrgizemiz. Baǵalaýshylar barlyǵy 2,5 myńdaı úıdi aralap shyqpaqshy. Tehnıkalyq tekserý kompanııalary úıdi kúrdeli jáne aǵymdaǵy jóndeý jóninde qorytyndysyn beredi. Biz soǵan materıaldar men múliktiń baǵasyn qosamyz», -deıdi «TABYS INVEST Ltd» JShS baǵalaýshysy Toqtamys Hamzın.
Oral qalasy ákiminiń orynbasary Jandos Dúısenǵalıevtiń sózine qaraǵanda, saıajaı ıelerinen zalaldy óteý boıynsha 10 myńnan astam ótinish túsken. Soǵan sáıkes birjolǵy áleýmettik tólem berý jumysy aıaqtalý qarsańynda.
«Birinshi kezekte saıajaıa ıeleriniń bir ǵana baspanasy bolyp tabylatyn 2 myńnan astam úıge tehnıkalyq tekserý jáne baǵalaý jumystary júrgizilýde. Buǵan ruqsaty bar jeti kompanııa tartylǵan. Sonymen qatar ótinishterdi qaraý kezinde keıbir máseleler eskeriledi. Mysaly, saıajaı ıeleriniń qujattary sáıkes kelmeýi múmkin. ıAǵnı halyqqa qyzmet kórsetý ortalyǵynda onyń aýyldaǵy apatty nemese satyp ketken úıi tirkelip turýy yqtımal. Sondaı-aq kópbalaly otbasynyń jataqhanada 17 sharshy metr páteri bar bolǵanymen, onda bári tura almaıtyny belgili. Sol sekildi ákesiniń nemese basqa da jaqynynyń atyndaǵy jyljymaıtyn múlikte 50-30 paıyz úlesi bolsa, ol da komıssııada qaralyp, sheshiledi», -deıdi Jandos Ashatuly.
Qazirgi kezde Jaıyq, Shaǵan jáne Derkól ózenderiniń jaıylmasynda ornalasqan saıajaılardyń 60-70 paıyzy áli sýda tur. Ol aýmaqtardan sý ketpeı, tehnıkalyq tekserý jáne baǵalaý jumystaryn júrgizý múmkin emes.
«Tekserilgen úılerdiń ishinen onshaqtysy apatty dep tanylyp otyr. Bul úılerde turatyndardyń baspanaly bolýy úshin birneshe nusqa qarastyrylǵan. Birinshisi, olarǵa jańa úılerden páter satyp alynyp beriledi. Ekinshisi, rıeltorlar arqyly ekinshi naryqtaǵy úıler alynady. Úshinshisi, qala shaǵynaýdandarynda jańadan kópqabatty úı salyp, páterlerdi sonyń ishinen bólý. Úı berilgen jaǵdaıda saıajaı ıeleri ýchaskelerin memleketke ótkizedi», -dedi J.Dúısenǵalıev.
Eske sala keteıik, budan buryn BQO-da saıajaılardan jer asty sýy sorylyp jatqanyn jazǵan bolatynbyz.
