Oralda sýǵa batyp bara jatqan adam qutqaryldy
ORAL. QazAqparat - Oralda qutqarýshylar er adamdy ajaldan aman alyp qaldy, dep habarlaıdy QazAqparat tilshisi.
BQO TJ departamenti jedel qutqarý jasaǵynyń bas qutqarýshysy Aıagóz Qojanbaevanyń aıtýynsha, oqıǵa keshe qalalyq mádenıet jáne demalys saıabaǵynda bolǵan.
Osyndaǵy jaǵajaıda kezekshilik etken bas qutqarýshy Denıs Bobarıkonyń sózine qaraǵanda, sýǵa batyp bara jatqan adamdy bular baıqap qalǵan. Ol sý betinde áreń turǵan ári sý jutyp úlgergen, denesi de salqyndaǵan. Ony qaıyqtyń ústine shyǵaryp, jaǵaǵa jetkizgen qutqarýshylar jedel járdem brıgadasyna tabys etti.
Oblystyq densaýlyq saqtaý basqarmasynyń baspasóz hatshysy Aınagúl Saqposynovanyń málim etkenindeı, qalalyq saıabaqqa jedel járdem saǵat 13.47-de shaqyryldy. Jedel járdem kóligi bes mınýttan keıin jetken. Sýǵa ketýden aman qalǵan 1989 jylǵy azamat aýrýhanaǵa jatýdan bas tartty.
Eske sala keteıik, sońǵy kúnderi óńirde sýǵa ketý oqıǵalary jıilep tur. Budan buryn Oralda 35 jasar áıeldiń, sosyn Jańaqala aýdanynda taǵy bir adamnyń sýǵa ketkenin jazǵan bolatynbyz.
