Oralda sý tasqynynan zardap shekken turǵyndarǵa 375 úıdiń kilti tabystaldy
ORAL. KAZINF0RM — Oral qalasynda sý tasqynynan zardap shekken turǵyndardyń qonys toıy jalǵasyn tapty. Keshe Derkól men Zashaǵan kentinde 183 úı paıdalanýǵa berilse, búgin Juldyz shaǵyn aýdanynda 192 januıaǵa jańa baspananyń kilti tapsyryldy.
Oblys boıynsha tasqynnan zardap shekkenderge 775 úı salynǵan edi. Qazirde turǵyndarǵa 685 úıdiń kilti tabystaldy. Endi qalǵany Qaratóbe aýdany, Qorjyn aýylynda 3 qyrkúıek kúni tabystalady.
Osylaısha Batys Qazaqstan oblysynda tasqynnan zardap shekken turǵyndardy baspanamen qamtý máselesi tolyqtaı sheshimin tabady.
Oraldaǵy Juldyz shaǵyn aýdanynyń turǵyndaryn qonys toımen Batys Qazaqstan oblysynyń ákimi Narıman Tóreǵalıev quttyqtady.
«Memleket basshysy Qasym-Jomart Kemelulynyń tapsyrmasyna sáıkes, Úkimettiń qoldaýymen tasqynnan zardap shekken turǵyndarǵa zań aıasynda tıisti kómek kórsetildi. Biz kesheden beri Oral qalasynyń saıajaılar alqabynda turyp, tasqynda jalǵyz baspanasynan aıyrylǵandarǵa jańa úılerdiń kiltterin tabys etip jatyrmyz. Qurylys jumystary tolyq aıaqtaldy. Úıge qatysty ınjenerlik jelilerdi, gaz-sýyn tolyq tartyp berdik. Halyqqa qolaıly bolý úshin asfalt salyp bereıin dep jatyrmyz. Sonymen qatar bul úılerge adamdar kóp qonystanǵandyqtan, balalar oınaıtyn oıyn alańyn da salyp beremiz» — dedi BQO ákimi Narıman Tóreǵalıev.
Oral turǵyny Qarlyǵa Jarmuhambetova sý tasqyny kezinde turyp jatqan jalǵyz baspanasynan aırylǵan. Búgin jańa úıine kirip, qýanyshyn jasyra almady.
«Kórshilerimizben „Juldyz“ shaǵyn aýdanyna keremet jańa úıge qonystanyp jatyrmyz. Memleket basshysy Qasym-Jomart Toqaevqa, Úkimetke halyqqa jasaǵan qamqorlyǵy úshin alǵysymyz sheksiz. Bala-shaǵamyzben jańa, keń úıge kirdik. Qýanyshymyzda shek joq”- dedi qala turǵyny Qarlyǵa Jarmuhambetova.
Osylaısha Oral qalasynda sý tasqynynan zardap shekken saıajaı turǵyndary úshin salynǵan 375 úıdiń qurylysy ýaqytynda bitti.
Budan bólek, saıajaı turǵyndaryna Oral qalasynan 1416 páter satyp áperilgen.
