Oralda sý tasqynynan zardap shekken turǵyndardan 640-tan astam ótinish qabyldandy

ORAL. KAZINFORM — Oral qalasy aýmaǵynda sý tasqynymen kúreske 1 016 adam, 413 arnaıy tehnıka jumyldyrylǵan.

Oral qalasy ákimdiginiń habarlaýynsha, sonyń ishinde jeke quramnan 860 adam, 5517-áskerı bóliminen 60 sarbaz, basqa óńirlerden kelgen TJ mınıstrligi kúshterinen 96 qyzmetker tartylǵan. 

Sý tasqyny bastalǵannan beri qum toltyrylǵan 220 myń qap daıyndaldy. 

Qazirgi tańda Jaıyq pen Shaǵan ózeni jaǵalaýlaryn bekitý jumystary júrgizilip jatyr. Bógenderdiń jalpy uzyndyǵy 9 500 metr bolsa, sonyń 4 800 metri qaýipti dep esepteledi. Osyndaı jerlerde 62,5 myń qap tóseldi. Buǵan 587 adam 126 tehnıkamen atsalysýda. 

Qala ákimdiginen túsken málimetke qaraǵanda, 12 evakýatsııalyq pýnktte 1 549 adam ornalasqan. Sý tasqynymen kúreske jumyldyrylǵan adamdarmen qatar evakýatsııalanǵan turǵyndarǵa úsh mezgil ystyq tamaq uıymdastyrylǵan. 

Qaýipsiz jerlerge 72 bas iri qara, 31 qoı-eshki, 8 jylqy aıdalyp, mal azyǵymen qamtyldy. 

«28 naýryz kúni Oral qalasy ákiminiń qaýlysymen tabıǵı sıpattaǵy tótenshe jaǵdaı saldarynan zardap shekkenderge zalaldy óteý úshin komıssııa quryldy. Kúni búginge deıin 641 ótinish tústi. Budan bólek, qalalyq máslıhattyń 2023 jylǵy 20 qyrkúıektegi № 5-3 sheshimine sáıkes zardap shekkenderge 50 AEK kóleminde materıaldyq kómek kórsetiledi. Qazirgi kezde 6 adamǵa tólengen. Sonymen qatar Oral qalasy TJ basqarmasynyń qyzmetkerleri Komıntern jáne Kýrenı aýdandarynda úlken sý kelgen jaǵdaıda turǵyndarǵa kóshýge daıyn bolýy kerektigi týraly habarlama taratty. Barlyǵy 304 úı qamtylyp, 165 habarlama berildi. Al 1, 2, 3-saıajaı qoǵamdastyqtary aýmaǵynda turatyndardyń negizgi bóligi qaýipsiz jerlerge kóshirildi. Qalǵan er adamdar óz úılerin urylardan kúzetýde», - dep habarlady vedomstvodan.

Eske sala keteıik, budan buryn BQO dárigerleri Astanaǵa barýy tıis júkti kelinshekti bosandyryp alǵanyn jazǵan bolatynbyz. 

Oralda evakýatsııalyq pýnktte turyp jatqan kelinshek tórtinshi balanyń anasy atandy.