Oralda sý tasqynynan zardap shekken múmkindigi shekteýli jan sot arqyly ótemaqyǵa qol jetkizdi

ORAL. KAZINFORM – Bıylǵy sý tasqynynan zardap shekken Oral qalasynyń turǵyny, ekinshi toptaǵy múgedek ótemaqyny sot arqyly óndirip aldy.

BQO sotynan túsken málimetke qaraǵanda, atalǵan azamat ótemaqyny tóleý úshin qala ákimdigine júgingen. Búlingen múlikti komıssııa 716 205 teńge dep baǵalaǵan. Alaıda 104 500 teńge ǵana tólengen. Munymen kelispegen M. birneshe ret qala men oblys ákimdigine júgingen. Tıisti jaýap almaǵan soń BQO mamandandyrylǵan aýdanaralyq ákimshilik sotyna talap aryz túsirgen.

«Aldyn ala tyńdaý barysynda taraptarǵa tatýlasý týraly kelisim usynylǵan. Kelisim shartyna sáıkes talap qoıýshy daýlaý týraly talaptan bas tartty. Al jaýapker eki baǵalaýshy kompanııanyń qateligin nazarǵa ala otyryp, bir aı merzim ishinde talap qoıýshynyń esepshotyna 449 300 teńge kóleminde materıaldyq zalal qosymsha aqysyn aýdarýǵa mindettendi. Nátıjesinde daý qos tarap úshin de ońtaıly sheshildi», - dep habarlady vedomstvodan.

Eske sala keteıik, budan buryn Batys Qazaqstanda úıi sýǵa ketken turǵynnyń quqyǵyn sotta qorǵap shyqqanyn jazǵan bolatynbyz.