Oralda stýdenttik teatrlar Alash qaıratkerleriniń beınesin sahnalady
ORAL. QazAqparat - Oral qalasynda joǵary oqý oryndary stýdentteri arasynda mádenı-tynyǵý jumysy mamandyǵy boıynsha ІH respýblıkalyq pándik olımpıada ótýde, dep habarlaıdy «QazAqparat» tilshisi.
Stýdenttik teatrlar festıvaline M.H.Dýlatı atyndaǵy Taraz memlekettik ýnıversıteti, M.Áýezov atyndaǵy Ońtústik Qazaqstan memlekettik ýnıversıteti, Qazaq memlekettik qyzdar pedagogıkalyq ýnıversıteti, A.Myrzahmetov atyndaǵy Kókshetaý ýnıversıtetiniń komandalary qatysýda. Ótken jyly osyndaı dodada birinshi oryndy ıelengen M.Ótemisov atyndaǵy Batys Qazaqstan memlekettik ýnıversıtetiniń stýdenttik teatry osy festıvaldi uıymdastyrý qurmetine ıe bolǵan-dy. Olar bul joly konkýrstan tys óner kórsetýde.
Komandalar birinshi týrda test tapsyryp, teorııalyq bilim deńgeıleriniń qandaı ekendigin tanytsa, ekinshi kezeńde Alashordanyń 100 jyldyǵyna oraı «Alash - altyn bastaý» taqyrybynda shyǵarmashylyq jumystaryn ortaǵa saldy.
M.Ótemisov atyndaǵy BQMÝ-dyń mádenıet jáne óner fakýltetiniń dekany Meıram Isataevtyń aıtýynsha, bıyl atalmysh JOO-nyń otaý tikkenine 85 jyl tolmaq. Elimizdegi eń baıyrǵy oqý oryndarynyń birinen sanalatyn BQMÝ 1991 jyldan beri mádenıet jáne óner mamandyqtary boıynsha muǵalimder daıarlaıtyn Batys óńirdegi birden-bir ýnıversıtet bolyp tabylady. Jyl saıyn BQMÝ stýdentteri halyqaralyq, respýblıkalyq olımpıada, baıqaýlarǵa qatysyp, joǵary nátıjelerge qol jetkizip keledi. Mysaly, 2016 jyly respýblıkalyq pándik olımpıadalarǵa 17 komanda baryp, sonyń 9-y júldeli oryndarmen oraldy.
«Shyǵarmashylyq saıys Alashorda qozǵalysynyń 100 jyldyǵyna arnalǵandyqtan, stýdenttik teatrlar Álıhan Bókeıhanov, Ahmet Baıtursynov syndy birtýar Alash qaıratkerleriniń beınesin sátti shyǵara bildi. Sonyń ishinde BQMÝ teatry Batys Alashordany basqarǵan Jahansha Dosmuhamedov pen Halel Dosmuhamedovterge qosa Bókeı handyǵynan túlep ushqan arystardyń esimderin jańǵyrtyp, tyndyrǵan isterin jarııa etti. Mundaı tarıhı ári eldik máni zor qoıylymdar zaldy toltyrǵan jastarǵa erekshe áser etti. Kelesi festıval osy joly jeńimpaz atanǵan ýnıversıtette ótedi», dedi «QazAqparat» tilshisine M.Isataev.
