Oralda stýdent qyz segizinshi qabattan sekirip ketken

  Oralda stýdent qyz segizinshi qabattan sekirip ketken, dep habarlaıdy Kazinform.

BQO polıtsııa departamentiniń baspasóz qyzmetinen málim etkenindeı, oqıǵa 21 qazan kúni boldy.

«Saǵat 13.20 shamasynda 1 kýrsta oqıtyn 17 jasar qyz jataqhananyń 8-qabatynan sekirip ketken. Saldarynan aýyr jaraqat alǵan stýdent Oral qalasyndaǵy oblystyq kópbeıindi aýrýhanaǵa jatqyzyldy. Atalǵan derek boıynsha Oral qalasy polıtsııa basqarmasynyń Abaı polıtsııa bólimi QR QK 105-baby 3-bóligine sáıkes (ózin-ózi óltirýge deıin jetkizý) sotqa deıingi tergeý amaldaryn júrgizýde. Qazirgi kezde oqıǵanyń mán-jaıy anyqtalyp jatyr», dep habarlady vedomstvodan.

BQO densaýlyq saqtaý basqarmasy baspasóz qyzmetiniń naqtylaýynsha, saǵat 13.40-ta J.Dosmuhamedov kóshesi boıyndaǵy jataqhanadan oblystyq jedel medıtsınalyq járdem stantsııasyna qońyraý shalynǵan. Stýdent qyz bastapqyda jaqyn jerde bolǵandyqtan, oblystyq kópbeıindi aýrýhanaǵa jetkizilgen. Keıin oblystyq kópbeıindi balalar aýrýhanasyna jatqyzyldy. Qazir jansaqtaý bóliminde, jaǵdaıy óte aýyr. Balalar neırohırýrginiń, travmatologtyń jáne hırýrgtyń baqylaýynda.

Eske sala keteıik, Oral qalasynda polıtsııa qyzmetkeriniń para alý kezinde ustalǵanyn jazǵan bolatynbyz.