Oralda stýdent dene shynyqtyrý sabaǵy ústinde qaıtys boldy

ORAL. QazAqparat – Oralda stýdent dene shynyqtyrý sabaǵy ústinde qaıtys boldy, dep habarlaıdy QazAqparat tilshisi.

BQO bilim basqarmasynan málim etkendeı, oqıǵa 9 qyrkúıek kúni Oral polıtehnıkalyq kolledjinde bolǵan.

«Úshinshi kýrs stýdenti Ýálıhan Ámirjanov dene shynyqtyrý sabaǵy ýaqytynda kenetten qulaǵan. Sol arada oqytýshy men medbıke tarapynan alǵashqy kómek jasaldy. Jedel járdem dárigerleri de kásibı kómek kórsetkenimen, stýdentti aman alyp qalý múmkin bolmady», dep habarlady vedomstvodan.

Bilim basqarmasy stýdenttiń jazataıym dúnıeden ótýine oraı ata-anasy, týǵan-týystaryna qaıǵylaryna ortaqtasyp, kóńil bildirdi.

Eske sala keteıik, budan buryn Oralda poıyzdyń jasóspirim qyzdy qaǵyp ketkenin jazǵan bolatynbyz.