Oralda Sport kúni merekesi atalyp ótti
ORAL. QazAqparat - Ǵ.Qurmanǵalıev atyndaǵy oblystyq fılarmonııa zalynda Sport kúnine oraı saltanatty jıyn boldy, dep habarlaıdy «QazAqparat» tilshisi.
Sharada sala qyzmetkerlerin óńir basshysynyń atynan Oral qalasynyń ákimi Murat Muqaev quttyqtap, sońǵy jyldary batysqazaqstandyq sportshylardyń dúnıejúzilik dodalarda top jaryp, júlde alyp júrgenin jetkizdi.
Aıtalyq, ótken jyly bokstan Danııar Eleýsinov Rıo Olımpıadasynyń chempıony atansa, áıelder kúresinen Ekaterına Larıonova qola medalǵa qol jetkizdi. Olardyń jeńisti jolyn shorttrekshiler jalǵastyryp, Abzal Ájiǵalıev, Nurbergen Jumaǵazıev álem kýbogy kezeńiniń jeńimpazy atandy. Oǵan qosa batysqazaqstandyq shorttrekshiler Almatyda ótken qysqy ýnıversıadada da tabysty óner kórsetti. Sol sekildi Aleksandr Stolnıkov, Qaırat Baıbekov, Vıtalıı Vorıvodın jáne Anton Kýznetsov voleıboldan Qazaqstan quramasy sapynda Azııa chempıonatynyń kúmis júldegeri atandy.
Oblysta Elbasy tapsyrmasyna sáıkes sportty damytý úshin barynsha kóńil bólinip keledi. Bıyldyń ózinde Aqsaı qalasy men Zelenov aýdanynda dene shynyqtyrý-saýyqtyrý kesheni boı kóterýde. Sondaı-aq Oral qalasynda 764 mln. teńgege qazirgi zamanǵy 17 sport alańyn paıdalanýǵa berý kózdelýde. Aldaǵy ýaqytta da oblys ortalyǵymen qatar aýdandarda da sport nysandaryn salý jalǵasatyn bolady. Munyń bári - memleket tarapynan turǵyndardyń, ásirese, jas urpaqtyń sportpen aınalysýy úshin jasalyp otyrǵan qoldaýdyń aıǵaǵy.
Jıyn barysynda erkin kúres pen short-trek bapkerleri Asqar Sáýkelın men Maksım Lozovoıǵa oblys ákiminiń alǵyshaty men «Qazaqstannyń eńbek sińirgen jattyqtyrýshysy» kýáligi tabys etildi. Sala úzdikteri men sport janashyrlary QR Mádenıet jáne sport mınıstrligi, oblys ákimi, oblystyq dene shynyqtyrý jáne sport basqarmasy basshysynyń alǵyshattarymen marapattaldy.
Eske sala keteıik, bıylǵy birinshi jartyjyldyqta BQO sportshylary resmı respýblıkalyq jáne halyqaralyq jarystarda barlyǵy 339 medaldi (116 altyn, 101 kúmis, 122 qola) jeńip alǵan bolatyn.
