Oralda sotqa qurmetsizdik tanytqan polıtsııa qyzmetkeri jaýapqa tartyldy

ORAL. KAZINFORM – Oral qalasynyń ákimshilik quqyq buzýshylyqtar jónindegi mamandandyrylǵan sotynda polıtsııa qyzmetkerine qatysty QR Ákimshilik quqyq buzýshylyq týraly kodeksiniń 653-baby 1-bóligi boıynsha ákimshilik is qaraldy.

BQO sotynyń baspasóz qyzmetinen málim etkenindeı, 2024 jylǵy 2 jeltoqsanda azamat A-nyń úsh shaǵymy sotqa túsip, osyǵan baılanysty sot otyrysy belgilengen.

Sot otyrysy týraly habarlamalar polıtsııa qyzmetkeriniń jumys ornyna jáne sms habarlama arqyly jiberildi. Alaıda polıtsııa ınspektory T. onlaın rejıminde qosylǵanymen, óz erkimen shyǵyp ketip, otyrysqa qatyspaǵan. Bul jaǵdaı isti ári qaraı qaraýǵa múmkindik bermedi. Sonymen qatar azamat A-ǵa qatysty materıaldar sotqa zerdeleý úshin usynylmaǵan.

- Polıtsııa qyzmetkeri óz kinásin moıyndap, sot otyrysynyń ótetinin umytyp ketkenin túsindirdi. Atalmysh kodekstiń 653-baby 1-bóligine sáıkes sotqa qurmetsizdik, ıaǵnı sot protsesine qatysýshylardyń óz mindetterin oryndamaýy ákimshilik jazaǵa ákep soǵady. Bul úshin eskertý berý, 20 aılyq eseptik kórsetkish (AEK) mólsherinde aıyppul salý nemese bes táýlikke deıin ákimshilik qamaýǵa alý sharalary kózdelgen. Sot polıtsııa ınspektorynyń quqyq buzýshylyqty alǵash ret jasaǵanyn jáne óz isine ókingenin eskere otyryp, oǵan ákimshilik jaza retinde eskertý berýmen shekteldi. Qaýly zańdy kúshine endi, - dep habarlady vedomstvodan.

Eske sala keteıik, budan buryn Oralda «Parkter dırektsııasy» basshysynyń orynbasary qamaýǵa alynǵanyn jazǵan bolatynbyz.