Oralda sot zańsyz qýylǵan qyzmetkerdi jumysqa qaıta alǵyzdy
ORAL. QazAqparat - Oralda sot qyzmetinen zańsyz bosatylǵan JShS qyzmetkerin jumysyna qaıta alǵyzdy, dep habarlaıdy QazAqparat tilshisi.
BQO sotynyń baspasóz qyzmetinen túsken málimetke qaraǵanda, talapker Ch. JShS-da zergerlik buıymdardy baǵalaýshy-kassır qyzmetin atqarǵan.
Bıylǵy qyrkúıekte JShS-da tekserý júrgizilip, kepilge salynǵan syrǵa joq ekendigi anyqtalǵan. Alaıda buıym sol kúni lombardqa qaıtarylǵan. Syrǵanyń basqa bólimde saqtalǵanyn, eshqaıda ketpegenin basshylyqtyń bilgenin kassırdiń burynǵy áriptesteri men JShS ókili rastady.
Osylaısha talapker JShS-ǵa esh zalal keltirmegen. Soǵan qaramastan, talapkerge qatysty qyzmettik tekserý bastalyp, qorytyndy shyǵarylǵan. Áıtse de JShS dırektory tekserý komıssııasyn qurý týraly buıryqty qyzmettik tekserý aıaqtalǵannan bir kúnnen keıin shyǵarǵan. Oǵan qosa jumys berýshi tártiptik jazany eki aı ótkennen keıin qoldanǵan. Eńbek zańnamasyna sáıkes ol bir aı ishinde qoldanylýy kerek.
Sonymen qatar jumys berýshi talapkerdiń eńbek kitapshasyn eńbek sharty buzylǵannan keıin qolyna bermeı, tıisti jazbalardy engizbeı, ózinde qaldyrǵan.
Oral qalasynyń №2 soty jumystan bosatý týraly buıryqty zańsyz dep tanyp, talapkerdi qyzmetine qaıta qalpyna keltirdi. Talapkerdiń qyzmetten eriksiz bos júrgen ýaqytyndaǵy 240 myń teńge jalaqysyn da óndirip berdi.
Sheshim zańdy kúshine endi.
