Oralda sot sheshimin elemegen salyq organynyń basshysy shyǵynǵa qaldy

ORAL. KAZINFORM – Sot sheshimderin oryndamaǵan Oral qalasy boıynsha memlekettik kirister basqarmasynyń basshysyna 50 AEK kóleminde aqshalaı óndirip alý salyndy.

BQO sotynyń baspasóz qyzmetinen málim etkenindeı, talapker atalmysh basqarmaǵa sottan tys bankrottyq rásimin qoldaný týraly ótinish jibergen. Biraq osy rásimdi qoldanýdan bas tartý týraly habarlama alǵan. Ol bul jóninde BQO mamandandyrylǵan aýdanaralyq ákimshilik sotyna shaǵymdanǵan.

Sot istiń materıaldaryn zerdelep, jaýapkerdiń «Qazaqstan Respýblıkasy azamattarynyń tólem qabilettiligin qalpyna keltirý jáne bankrottyq týraly» Zańyn buzǵanyn anyqtady, oǵan qosa basqarma talapkerdi ózin bankrot dep jarııalaý quqyǵynan aıyrdy. Sondaı-aq jaýapker ákimshilik rásimdi júrgizý tártibin buzdy.

Osyǵan baılanysty atalmysh sottyń sheshimimen talap qanaǵattandyryldy, salyq organynyń habarlamasy zańsyz dep tanyldy. Sot jaýapkerdi bir aı merzimde talapkerge qatysty qozǵalǵan ákimshilik rásimdi júrgizýge jáne aıaqtaýǵa mindettedi. Sonymen qatar jaýapkerden 70 myń teńge kóleminde ókildiń kómegine aqy tóleý boıynsha shyǵystar, 18 460 teńge somasynda memlekettik baj tóleý boıynsha shyǵystar óndirildi.

«2024 jylǵy 27 tamyzda sheshim zańdy kúshine endi, 4 qyrkúıekte oryndaýǵa baǵyttalǵan. Alaıda, sottyń sheshimi belgilengen merzimde oryndalmady, osyǵan baılanysty sot óz otyrysyn belgileı otyryp, aqshalaı óndirip alý týraly máseleni qarady. Salyq organynyń basshysy ekonomıka jáne bıýdjet jónindegi komıssııanyń otyrysy josparlanyp otyrǵanyn aıtyp, sot otyrysyna kelmedi. Jaýapkerdiń ókili qazirgi ýaqytta sot aktisin oryndaý boıynsha sharalar qabyldanyp jatqanyn, joǵary turǵan organǵa aqsha qarajatyn bólý týraly ótinishhat jiberilgenin aıtty. Áıtse de jaýapkerdiń qarajat bólý týraly ótinishhatty jiberý týraly dálelderi aqshalaı óndirip alýdan bosatý úshin negiz bolyp tabylmaıdy, óıtkeni sot aktisi 4 qazanǵa deıingi merzimde tolyq kólemde oryndalýy tıis edi. Osylaısha, QR Ákimshilik rásimdik protsestik kodekstiń 127-baby 5, 6-bólikterine sáıkes sot uıǵarymymen Oral qalasy boıynsha memlekettik kirister basqarmasynyń basshysyna 50 AEK mólsherinde (184,6 myń teńge) aqshalaı óndirip alý salyndy», dep habarlady vedomstvodan.

Eske sala keteıik, budan buryn sot sheshimin oryndamaǵan Oral ákiminiń memleketke 700 myńnan asa teńge tóleıtinin jazǵan bolatynbyz.