Oralda sot mektep ákimshiliginiń muǵalimderge artyq aqsha tólengeni týraly shaǵymyn qanaǵattandyrmady

ASTANA. KAZINFORM - Batys Qazaqstan oblysy, Oral qalasyndaǵy Serebrıakov orta mektebiniń ákimshiligi mekteptiń 75 pedagogynan bıýdjetten artyq tólengen 42 mln teńge kólemindegi jalaqyny óndirip alý týraly sotqa talap joldaǵan.

QR Joǵarǵy soty baspasóz qyzmetiniń habalaýynsha, talap qoıýda memlekettik aýdıttiń qorytyndysy negizge alynǵan.

Tergeý organy mekteptiń bas býhgalterine qatysty qylmystyq is qozǵap, Oral qalalyq sotynyń sheshimimen ol kináli dep tanylyp, jaza taǵaıyndalǵan.

Qylmystyq is aıasynda mektepke júrgizilgen memlekettik aýdıt nátıjesinde 2021-2022 jyldary 75 pedagogqa jalaqy boıynsha 42 mln teńge kóleminde artyq tólemder negizsiz aýdarylǵany, sóıtip, qarjylyq quqyq buzýshylyq anyqtalyp, debıtorlyq qaryz eseptelgen.

Alaıda, sotta mektep ákimshiliginiń ókilderi pedagogtardyń qandaı da bir quqyqqa qarsy áreketter jasaǵanyn, sonyń saldarynan olarǵa artyq qarajat aýdarylǵanyn dáleldeıtin dálelderdi usyna almaǵan.

Osyǵan baılanysty №2 Oral qalalyq soty mekteptiń talap qoıýyn qanaǵattandyrýsyz qaldyrdy.

Sot jumysqa nemquraıly qaraý nemese býhgalterlik qatelik bolmaǵan jaǵdaıda eńbek jáne azamattyq zańnamada kórsetilgendeı, artyq tólengen somany qaıtarýǵa negiz joq ekenin atap kórsetti.

«Apellıatsııa mektep ókiliniń shaǵymyn qanaǵattandyrmaı, sot sheshimin ózgerissiz qaldyrdy»,-delingen habarlamada.

Osyǵan deıin Oralda sý tasqynynan zardap shekken múmkindigi shekteýli jan sot arqyly ótemaqyǵa qol jetkizgeni týraly jazdyq.