Oralda sot qyzmetkerleri memlekettik tilden saıysqa tústi
ORAL. QazAqparat - Bıylǵy tamyz aıynda Oralda sotqa arnalyp salynǵan ásem ǵımaratqa qonystanǵan biryńǵaı azamattyq isterdi qaraýǵa mamandanǵan Oral qalalyq №2 soty jańa meken-jaıdaǵy qyzmetin tartymdy qoǵamdyq is-sharalarymen ushtastyra bastady.
Sonyń biri retinde keńse mamandarynyń memlekettik tildi bilýine arnalǵan baıqaý uıymdastyryldy.
BQO sotynyń baspasóz qyzmetinen túsken málimetke qaraǵanda, atalmysh sot tóraǵasy Murat Imanbaev, qalalyq sottyń sýdıalary, sottyń keńse meńgerýshisi, Batys Qazaqstan oblystyq sotynyń memlekettik tildi damytý máseleleri boıynsha bas mamany, Qazaqstan Jazýshylar odaǵynyń múshesi Amankeldi Shahın qazylyq etip, sýdıalar men sot qyzmetkerleri qulshyna tamashalaǵan memlekettik til saıysy mazmundy ótti.
Saıys úsh týr, bes tapsyrmadan turdy. Eki kezeńnen turatyn alǵashqy týrdyń birinshi kezeńinde konkýrsqa qatysýshy ózin tanystyrsa, ekinshi kezeńde sot bıligine qatysty maqal-mátelder aıtyp, mazmunyn túsindirdi nemese ańyzǵa aınalǵan bı sheshimderin mánerlep aıtyp berdi. Eki tapsyrmadan turatyn ekinshi týrda jarysqa qatysýshylar qazaq tiliniń grammatıkasyn qanshalyqty meńgergenderin kórsetip, sot tóreligine qatysty sózdi septedi. Al úshinshi týrda komıssııa músheleri kezektese usynǵan zań termınderin orysshadan qazaqshaǵa aýdardy.
Sot qyzmetkerleriniń kópshiligi erkin sóz saptap, sóılemderdi jetik taldady. Tipti aralarynda aqyndyq qabileti barlary da baıqaldy.
Qyzǵylyqty, tartysty ótken básekede jetekshi maman Gúlnur Ádilbekova top jarsa, ekinshi oryndy bas maman Dınara Bekqojına ıelendi. Jetekshi maman Gúldana Bolatova úshinshi orynǵa shyqty. Jeńimpaz-júldegerlerge dıplomdar men syılyqtar tabys etildi. Jarysqa qatysýshylardyń qaı-qaısysy da da marapattan shet qalmady. Móldir Bekqalıeva, Aleksandar Habıbýlın, Mádına Qulmanova, Altyn Raıdollına, Álimbaı Islıamǵalıevterge qalalyq sot tóraǵasynyń alǵyshattary tabys etildi.
Shara barysynda saıysqa qatysýshylar óz ónerlerin kórsetip, jankúıerlerdi rýhanı sýsyndatty.
«Memlekettik tildiń aıasyn keńeıtý - óte mańyzdy másele. Muny biz kúnbe-kún nazarda ustap, qyzmetkerlerimizdiń qazaq tilin meńgerip, saýatty qoldanýyna barynsha kúsh salýdamyz», dedi M.Imanbaev.
