Oralda Sorochın jármeńkesi onynshy ret uıymdastyryldy

ORAL. QazAqparat - Búgin Oral qalalyq mádenıet jáne demalys saıabaǵynda dástúrli Sorochın jármeńkesi ótkizildi.

Ýkraın halqynyń tamyry tereńge ketken merekesi Oralda 2007 jyldan beri toılanyp keledi. Bul joly da azyq-túlik ónimderi men ulttyq taǵamdar, qolóner týyndylary qoıylyp, Oral qalasy men oblys aýdandarynan kelgen etnomádenı birlestikter ókilderi óz ónerlerin kórsetti. Kontsert sońy halyqtyq serýender men túrli oıyndarǵa ulasty.

Jınalǵandardy BQO ákimi apparaty «Qoǵamdyq kelisim» KMM dırektory Aleksandr Ájiǵalıev quttyqtap, ýkraın etnomádenı birlestiginiń bıyl atalmysh merekeni onynshy ret uıymdastyryp otyrǵanyn aıtyp, izgi tilegin bildirdi.

«Budan jıyrma jyldan astam ýaqyt buryn Qazaqstan halqy Assambleıasy aıasynda etnomádenı birlestikter qurylyp, jumys jasaı bastady. Sóıtip ár ult ókilderiniń óz mádenıeti men tilin, salt-dástúrlerin saqtap, damytýyna múmkindik berildi. Ýkraın etnomádenı birlestigi de «Beregınıa» hory qurylǵannan keıin óz merekesin uıymdastyrýǵa bekindi. Jalpy, Qazaqstan halqy BQO assambleıasy ár etnomádenı birlestiktiń jyl saıyn óz ulttyq meıramyn ótkizýine uıytqy boldy. Sondyqtan bizdiń birlestik Sorochın jármeńkesin uıymdastyryp keledi. Bul halyqtyq meıram egin jınalyp, kúzgi jıyn-terin bitkennen keıin toılanady. Aıta keteıik, oblysta 11 myńdaı ýkraın ultynyń ókilderi turady, sany jóninen qazaqtar men orystardan keıin úshinshi orynda. Respýblıkada ýkraın tilinde gazet shyǵady, basqa da sharalar udaıy ótýde. Munyń bári de - eldegi birlik pen kelisimniń arqasy», dedi «Ednannıa» ýkraın ulttyq-mádenı ortalyǵynyń tóraǵasy Vıktor Tarasenko.