Oralda sorǵy stansasynda eki jumysshynyń qaza tabýyna baılanysty qylmystyq is qozǵaldy
QazAqparat budan buryn jazǵanyndaı, Oralda sorǵy stansasynda qubyr jarylyp, eki jumysshy káriz sýyna batyp ketken bolatyn.
BQO polıtsııa departamentiniń baspasóz qyzmetinen málim etkenindeı, 2-káriz sorǵy stansasynda 1971 jáne 1982 jylǵy qyzmetkerler ysyrmany aýystyrý jumysyn júrgizgen. Aldyn ala málimet boıynsha ysyrma julynyp, sonyń saldarynan sorǵy stansasy káriz sýyna tolyp, eki jumysshy batyp ketken.
«Qazirgi kezde atalǵan derek boıynsha QR QK 156-baby 4-bóligine (eńbekti qorǵaý qaǵıdalaryn buzý) sáıkes sotqa deıingi tergeý amaldary júrgizilýde», dep habarlady vedomstvodan.
Bul oqıǵaǵa baılanysty Oral qalasynyń ákimi Mırjan Satqanov áleýmettik jelidegi paraqshasynda pikirin bildirdi.
Shahar basshysy qaıǵyly oqıǵanyń barlyq mán-jaıyn anyqtaý úshin komıssııa qurylyp, jaýaptylar anyqtalatynyn jetkizdi.
«Qaza tapqan qyzmetkerlerdiń otbasylary men týystaryna qaıǵyryp kóńil aıtamyn. Biz olarǵa óz tarapymyzdan jan-jaqty kómek pen qoldaý kórsetetinimizdi jetkizgim keledi», dedi ákim.