Oralda soǵys ardagerine eskertkish ornatyldy
BQO TJ departamentiniń aýmaǵynda ornatylǵan eskertkishti oblys ákiminiń birinshi orynbasary Muhtar Mankeev pen maıdangerdiń uly Evgenıı Muhtarov ashty.
«Uly Jeńistiń 75 jyldyǵyna oraı maıdangerler qurmetine arnalǵan sharalar óńirde jalǵasýda. Demeýshilerdiń qoldaýymen ornatylǵan búgingi eskertkish – sonyń biri. Shúkir Muhtarov elge jeńispen oralǵannan keıin de este qalarlyqtaı eńbek etti. 1961 jyly KSRO Mınıstrler Keńesiniń jarlyǵymen azamattyq qorǵanys júıesi uıymdastyryldy. Oblysta qurylǵan azamattyq qorǵanys shtabyn Shúkir Omaruly 1962 jyldan 1975 jyly zeınetke shyqqanǵa deıin abyroımen atqardy. Onyń basshylyǵymen óńirde azamattyq qorǵanys salasy órge basyp, kóptegen kadrlar tárbıelenip shyqty», dedi M.Mankeev.
Medıtsına qyzmetiniń doǵarystaǵy maıory Evgenıı Muhtarovtyń aıtýynsha, ákesi 1922 jyly 27 qyrkúıekte BQO-nyń Taıpaq aýdany Bazartóbe aýylynda dúnıege kelgen. 1941 jyly jeltoqsanda áskerge alynǵan ol qyzmetin Orta Azııa áskerı okrýgi men Batys maıdanynyń 100-atqyshtar brıgadasynyń 100-derbes baılanys batalonynda bólimshe komandırliginen bastady.
1942 jyly Ýral áskerı okrýgi Chelıabi tank tehnıkalyq ýchılışesine oqýǵa jiberilip, keıin Karel maıdanynda 338-gvardııalyq aýyr artıllerııa polkinde ISÝ-152 aǵa mehanık-júrgizýshisi boldy.
Belorýssııadan Kenıgsbergke deıin jetken leıtenant soǵys bitkennen keıin de Túrkistan, Orta Azııa áskerı okrýgterinde ásker qatarynda qyzmet etýdi jalǵastyrdy.
Maıdandaǵy erligi úshin «Qyzyl Juldyz», ekinshi dárejeli Otan soǵysy ordenderimen jáne medaldarmen marapattalǵan Shúkir Muhtarov 1986 jyly ómirden ótti.
Shara barysynda BQO TJ departamentiniń bastyǵy, general-maıor Jasulan Jumashev, Sh.Muhtarovtyń qaryndasy Álııa Esenǵalıeva, BQO azamattyq qorǵaý qurylymdary ardagerleri keńesiniń tóraǵasy Ermekqalı Mashanov sóz sóılep, maıdanger ómiri týraly syr shertti.
Eske sala keteıik, budan buryn Oralda Halyq qaharmany Hıýaz Dospanova atyndaǵy kóshe ashylǵanyn jazǵan bolatynbyz.
