Oralda «Smart sıtı» tujyrymdamasyna sáıkes jańa tehnologııalar engizilýde
ORAL. QazAqparat - Oralda «Smart sıtı» tujyrymdamasyna sáıkes jańa tehnologııalar engizilýde. Bul týraly búgin Elbasy Joldaýyn talqylaý men júzege asyrý máselelerine arnalǵan qala aktıviniń jıynynda shahar basshysy Murat Muqaev málim etti, dep habarlaıdy «QazAqparat» tilshisi.
Onyń aıtýynsha, Oral qalasynda aqyldy tehnologııalar qazirdiń ózinde oń jemisin berýde, sonyń ishinde turǵyn úı-kommýnaldyq sharýashylyǵy jáne densaýlyq saqtaý salasynda pılottyq jobalar qolǵa alyndy.
Memlekettik qyzmet sapasyn arttyrý maqsatynda júzege asyrylǵan «Qoljetimdi ákimdik» jobasy turǵyndardan qujat qabyldaý kezinde kezekti azaıtyp, sybaılas jemqorlyq kórinisterine barynsha tosqaýyl qoıýǵa múmkindik berdi. Mundaı joba Oraldan basqa Almatyda ǵana qolǵa alynǵan. Ákimdikke memlekettik qyzmet túrin alý úshin kún saıyn 300-deı adam keledi. Joba qolǵa alynǵannan bergi jeti aı ishinde 30 myńnan astam adamǵa qyzmet kórsetildi.
Qalada elektrondy PIK júıesi belsendi engizilýde. Bul turǵyndar men PIK baılanysyn jaqsartyp, qarjynyń jumsalýyn ashyq baqylap otyrýǵa múmkindik beredi.
Turǵyndarmen keri baılanys aıasynda áleýmettik jeliler (Instagram ı Telegram) men arnaıy saıtta (uralskcontrol.kz) «Halyqtyq baqylaý» jobasy engizildi. Osy jeliler arqyly turǵyndar qala ákimdigine ózderiniń ótinish-tilekterin jetkizip, túrli máselelerdiń sheshilýine tikeleı atsalysady.
Bilim berý salasynda balabaqshalarǵa kezekke turý júıesi tolyqtaı avtomattandyrylatyn bolady.
Jolaýshylar kóligi salasynda «INFO-BUS» jobasy arqyly turǵyndarǵa qaladaǵy qoǵamdyq avtokólik qozǵalysyn tikeleı baqylap otyrýǵa múmkinlik jasaldy. Kúni búgin avtoparktiń 92 paıyzy datchıktermen qamtamasyz etilgen. Atalmysh qosymshany 23247 paıdalanýshy ózderiniń telefonyna engizip úlgergen, bul qala turǵyndarynyń 8 paıyzdan astamyn quraıdy. Ótken jyldyń qarasha aıynan beri úsh baǵytta júretin avtobýstarda SMS BUS júıesiniń kómegimen jolaýshylar jolaqyny sms-habarlama arqyly tóleı bastady. Mundaı jumystar bıyl da jalǵasady.
«Smart sıtı» tujyrymdamasy aıasynda qalany qoǵamdyq WI-FI júıesimen de qamtý kózdelýde. Bul joba adam kóp júretin oryndardan bastap kezeń-kezeńmen júzege asyrylatyn bolady», dedi Murat Muqaev.
