Oralda «Sıtı tsentr» saýda ortalyǵynyń ıesine iri kólemde aıyppul salyndy
ORAL. QazAqparat - Oralda órt qaýipsizdigin saqtamaǵan «Sıtı tsentr» saýda ortalyǵynyń ıesine iri kólemde aıyppul salyndy, dep habarlaıdy QazAqparat tilshisi.
Búgin Oral qalasynyń mamandandyrylǵan ákimshilik soty ótken jylǵy 27 jeltoqsanda berilgen uıǵarymdaǵy buzýshylyqtardy joımaǵany úshin «Sıtı tsentr» saýda oıyn-saýyq ortalyǵynyń ıesin ákimshilik jaýapkershilikke tartty.
BQO sotynyń baspasóz qyzmetinen túsken málimetke qaraǵanda, bıyl kóktemde qaıta teksergen kezde 97 buzýshylyqtyń 36-sy joıylmaǵan bolyp shyqty.
TJ departamenti qyzmetkerleriniń aıtýynsha, saýda ortalyǵy kópshilik jınalatyn oryn ekendigi belgili. Sondyqtan órt bola qalǵan jaǵdaıda qaýipsizdikti saqtamaýdyń sońy adamdardyń zardap shegýine soqtyrýy yqtımal.
Azamattar ómirine qaýip tóndiretin buzýshylyqtardy joımaǵany úshin sot saýda ortalyǵynyń ıesine 200 AEK (481 myń teńge) kóleminde aıyppul salyp, keshen qyzmetin bir aı merzimge toqtatty.
Qaýly zańdy kúshine engen joq.
Bıyl jyl basynan beri sot órt qaýipsizdigin saqtamaǵany úshin úsh kásipkerdi jaýapkershilikke tartty. Olardyń árqaısysyna kásipkerlik nysanyna baılanysty 100-den 200-ge deıin AEK mólsherinde aıyppul salyndy.
Eske sala keteıik, Kemerovo qalasyndaǵy qaıǵyly oqıǵadan keıin Oralda saýda ortalyqtaryn tekserý jumysy júrgizilip jatqanyn budan buryn jazǵan bolatynbyz.
