Oralda sıntetıkalyq esirtki taratqan kúdikti ustaldy
ORAL. KAZINFORM — Oralda sıntetıkalyq esirtki taratqan 19 jastaǵy jigit ustaldy, dep habarlaıdy Polisia.kz.
Esirtki qylmysyna qarsy is-qımyl basqarmasynyń qyzmetkerleri kúdiktini tintý kezinde 22 zıp-paketke oralǵan aq untaq tárizdi zatty tapqan. Paketter folgaǵa oralǵan. Sondaı-aq polıtseıler jaqyn mańdaǵy aýmaqty tekserý barysynda úsh túrli jasyryn orynnan taǵy 3 paket tapty.
Sot-hımııalyq saraptama qorytyndysy boıynsha tárkilengen zat sıntetıkalyq esirtki sanatyna jatatyn alfa-PVP ekeni anyqtaldy. Jalpy salmaǵy — 14,97 gramm.
Atalǵan fakti boıynsha qylmystyq is qozǵaldy. Qazir tergeý júrip jatyr. Onyń barysynda tyıym salynǵan zattyń jetkizilý arnalary men ózge de qatysy bar tulǵalar anyqtalady.
Buǵan deıin Qaraǵandyda esirtki taratqan sheteldikter ustaldy.