Oralda short-trekten el chempıonaty márege jetti
ORAL. QazAqparat - Oral qalasyndaǵy jabyq muz aıdyny sport saraıynda short-trekten balalar-jasóspirimder sport mektepteri, olımpıadalyq rezervtegi daıarlaý ortalyqtary jáne mektep-ınternattar tárbıelenýshileri arasynda el chempıonaty márege jetti, dep habarlaıdy «QazAqparat» tilshisi.
Birinshilikke segiz komanda quramynda 177 sportshy qatysyp, tórt jas ereksheligine qaraı synǵa tústi.
Jarys qorytyndysynda batysqazaqstandyq shorttrekshiler de júldegerler qatarynan kórine bildi. Atap aıtqanda, aǵa jastaǵylar arasynda Sultan Kereı, Aıdar Aqtanov, Álisher Shatyqov 2 myń metrlik estafetalyq jarystan márege ekinshi bolyp jetti. Orta jastaǵylardan Eseı Ibraev 1 myń metrlik qashyqtyqta kúmis júldeger atansa, 500 metrden jáne 1 myń metrden sýperfınalda qola medalǵa qol jetkizdi.
Qyzdar arasynda Anelıa Kereı, Aqbota Saǵdıeva jáne Renata Kýlperdısova 2 myń metrlik estafetada ekinshi orynǵa kóterildi. Kishi jastaǵylar arasynda Shyńǵys Ermek 777 metrlik sýperfınalda úshinshi orynǵa ıe boldy.
Sondaı-aq Shyńǵys Ermek, Álıhan Qanat, Maqsat Ýálıolla jáne Álibek Ǵubaev estafetada kúmis medaldi jeńip aldy. Kishi jastaǵy qyzdardan Nargız Omarova sátti óner kórsetip, eki kúmiske (777 metr, 333 metr) qosa 777 metrlik sýperfınalda chempıon atandy. Ol Alına Ájiǵalıeva, Gúlbaǵym Qalımen birge 2 myń metrlik estafetada da aldyna jan salmady. Sol sekildi Maqsat Turarbekov, Meıirjan Tólegen, Gúldana Jalmuhan, Mádına Bekentaeva, Nargıza Jumaǵalıevalar da júldesiz qalǵan joq. Olardy Qazaqstannyń eńbek sińirgen jattyqtyrýshysy Maksım Lozovoı bastaǵan mamandar daıyndady.
Osylaısha, chempıonat qazirgi kezde el namysyn qorǵap, álemdik dodalarda júlde alyp júrgen batysqazaqstandyqtar Abzal Ájiǵalıev, Nurbergen Jumaǵazıev, Aıdar Bekjanov, Anıta Nagaılardyń izbasarlary ósip kele jatqandyǵyn kórsetti.
