Oralda shybyn-shirkeıge qarsy kúreste aldyn alý sharalary bastaldy
ORAL. KAZINFORM — Oral qalasy jáne onyń mańynda shybyn-shirkeıge qarsy kúres sharalary qandaı kólemde júrgiziletini belgili boldy.
BQO energetıka, turǵyn úı-kommýnaldyq sharýashylyq basqarmasynyń basshysy Beıimbet Mýsınniń málim etkenindeı, merdiger mekeme «Magtoksın» JShS entomologııalyq kórsetkishterge sáıkes aldyn alý sharalaryna 16 sáýirden bastap kiristi.
Beıimbet Málikulynyń sózine qaraǵanda, bastapqy kezeńde sý aıdyndary, jaıylmalar jáne tómende ornalasqan ýchaskelerde dernásilderge qarsy óńdeý jumystary júrgizilip jatyr. Kelisimshart boıynsha jalpy jumys kólemi 2 myń gektar bolsa, sonyń 800 gektary óńdeldi.
— Óńdeý jumystary shaharda Tıýlenın men Sholohov kósheleri boıyndaǵy jerasty sýlary bar tómengi ýchaskelerde, Teleortalyq, qalalyq mádenıet jáne demalys saıabaǵy, «Oral» sport bazasy, Rybtseh pen Derkól aralyǵy, Zachagan kenti, Batys Qazaqstan agrarlyq-tehnıkalyq ýnıversıteti mańyndaǵy sý aıdynynda júrgizildi. Sondaı-aq qalaǵa jaqyn ornalasqan Báıterek aýdany Mashtakov jáne Jambyl aýyldaryndaǵy jaıylmalar qamtyldy, — dedi B.Mýsın.
Onyń aıtýynsha, kelesi kezeń shybyn-shirkeı jappaı ushqan ýaqytta bastalady. Oral qalasy men taıaý mańdaǵy eldi mekenderde 11 myń gektar aýmaqta ýlaý jumystary júrgiziletin bolady.
Eske sala keteıik, budan buryn Oralda 101 mln teńgege shybyn-shirkeıdi ýlaý jumystary júrgiziletinin jazǵan edik.
