Oralda «Shańyraq» shyǵarmashylyq baıqaýy qorytyndylandy
ORAL. QazAqparat - Oraldaǵy Dostyq úıinde «Shańyraq» shyǵarmashylyq baıqaýy qorytyndylandy, - dep habarlaıdy «QazAqparat» tilshisi.
Qazaqstan halqy BQO assambleıasy tóraǵasynyń orynbasary, hatshylyq meńgerýshisi Ǵaısa Qapaqovtyń aıtýynsha, QHA atalmysh saıysty respýblıkalyq deńgeıde turaqty ótkizip keledi. Bıylǵy erekshelik, baıqaýdyń oblystyq kezeńi Elbasynyń «Bolashaqqa baǵdar: rýhanı jańǵyrý» maqalasy aıasynda uıymdastyryldy.
Baıqaýǵa oblystyq, qalalyq jáne aýdandyq BAQ-tardan jıyrmadan astam jýrnalıst óz jumystaryn usyndy. Qazylar alqasynyń sheshimimen solardyń ishinen 12-si úzdik dep tanylyp, túrli atalymdar boıynsha dıplomdarmen jáne aqshalaı syılyqtarmen marapattaldy. Olardyń arasynda «Jaıyq Press» JShS-ǵa qarasty oblystyq «Oral óńiri» jáne «Prıýrale» gazetteriniń tilshileri Gúlsezim Bııasheva, Gúljamal Kenjeǵalıeva, Dınara Kınderbaeva, Janna Balyqova, Oksana Katkova, «Aqjaıyq» telearnasynyń redaktorlary Munaıdar Balmolda, Roza Satqanova, Oksana Igilikova, Aıgúl Logashkına, sondaı-aq Syrym aýdandyq «Syrym eli» gazetinen Baýyrjan Shırmedınuly, Qaztalov aýdandyq «Aýyl aınasy» gazetinen Gaýhar Qurmanǵazıeva bar.
«Buqaralyq aqparat quraldarynyń ókilderi eldiń birligin baıandy etip, ultaralyq tatýlyqty nasıhattaýda belsendi eńbek etip júr. Respýblıkalyq baıqaýda ázirge batysqazaqstandyq jýrnalıster júlde ala qoıǵan joq. Olardy áli de yntalandyra túsý maqsatynda kelesi jyly júlde qoryn kóbeıtpek oıdamyz. Sondaı-aq blogerlerdi de qatystyratyn bolamyz», dedi «QazAqparat» tilshisine Ǵ.Qapaqov.
