Oralda Shamǵon Qajyǵalıevtyń 90 jyldyǵyna oraı dırıjerler baıqaýy márege jetti
ORAL. QazAqparat - Búgin Oralda ataqty dırıjer, KSRO jáne Qazaqstannyń halyq ártisi, Memlekettik syılyqtyń laýreaty, «Otan», «Parasat» ordenderiniń ıegeri, professor Shamǵon Qajyǵalıevtiń (1927-2015) 90 jyldyǵyna oraı ІІІ respýblıkalyq dırıjerler baıqaýy márege jetti, dep habarlaıdy «QazAqparat» tilshisi.
Eki kúnge sozylǵan saıys barysynda toǵyz úmitker Ǵ.Qurmanǵalıev atyndaǵy BQO fılarmonııasy Dáýletkereı atyndaǵy halyq aspaptar orkestriniń qatysýymen dırıjerlik ónerlerin kórsetýge múmkindik aldy. Aıtýly dodaǵa elge tanymal óner qaıratkerleri Aıtqalı Jaıymov (tóraǵa), Jalǵasbek Begindikov, Rahat Madreev, Arman Júdebaev, Erkin Nurymbetov qazylyq etti.
Baıqaý qorytyndysynda Mańǵystaý oblystyq Abyl Taraquly atyndaǵy orkestrdiń dırıjeri Álibek Muratov bas júldeni jeńip aldy. Soltústik Qazaqstan oblysynan kelgen Segiz seri atyndaǵy orkestrdiń kórkemdik jetekshisi ári bas dırıjeri Qaıyrly Ǵafýrov birinshi, BQO estradalyq-sımfonııalyq jáne kameralyq orkestriniń dırıjeri Ashat Hasanov ekinshi, Ońtústik Qazaqstan oblysy Súgir atyndaǵy orkestrdiń bas dırıjeri Erlan Dáýrenbekov pen Almatydaǵy P.Chaıkovskıı atyndaǵy mýzyka kolledji orys halyq aspaptar orkestriniń dırıjeri Aıdos Meńdálıev úshinshi orynǵa ıe boldy.
Búgin keshkisin oblystyq qazaq drama teatrynda baıqaý jeńimpaz-júldegerleriniń jáne qazylar alqasy músheleriniń qatysýymen gala-kontsert ótedi.
