Oralda «Shalqar tolqyny» respýblıkalyq baıqaýynyń jeńimpazdary anyqtaldy
ORAL. QazAqparat - Batys Qazaqstanda respýblıkalyq «Shalqar tolqyny» respýblıkalyq baıqaýynyń jeńimpaz-júldegerleri anyqtaldy, dep habarlaıdy QazAqparat tilshisi.
Bıyl Terekti aýdanynda ekinshi ret uıymdastyrylǵan jas ánshiler dodasyna respýblıka óńirlerinen 26 úmitker qatysyp, baq synady.
Eki kezeńnen turatyn baıqaý barysynda úzdik shyqqandar iriktelip, Shalqar kóliniń jaǵasynda bolǵan gala-kontsertte óner kórsetti.
Saıys qorytyndysynda Terekti aýdanynyń «Úsh qońyr» trıosy bas júldeni (400 myń teńge) jeńip aldy.
Mańǵystaý oblysynan kelgen Baqtyly Kúnebaeva birinshi (250 myń teńge), oraldyq Taras Jaýymbaev ekinshi (150 myń teńge), túrkistandyq Óserbaı Bórihanov pen astanalyq Azamat Amangeldiuly úshinshi (100 myń teńgeden) orynǵa ıe boldy.
Sonymen qatar, aqtóbelikter Ernar Dúıseev pen Almat Smatov, oraldyqtar Rýstam Hafızov pen Damır Satybaev, Zelenov aýdanynan Ahan Jekekov, Terektiden Erhat Jaqashev, Qaztalovtan Ashat Nyǵmetov dıplomant atandy.
Qalǵan qatysýshylarǵa alǵyshattar tabys etildi.
Terekti aýdanynyń ákimi Kárim Jaqypovtyń aıtýynsha, jas talanttardy qoldaý baǵytynda qolǵa alynǵan baıqaý aıasy jyl saıyn keńeıe túsip keledi.
Ótken jyly alǵash ret oblystyq deńgeıde uıymdastyrylǵan baıqaýǵa 13 jas ánshi qatyssa, bıyl elimizdiń ózge aımaqtarynan da at shaldyryp kelgen úmitkerler synǵa tústi.
