Oralda shaqalaqty dalaǵa tastaǵan áıel balasyn qaıta baýyryna basqysy keledi
ASTANA. QazAqparat - Oralda jańa týǵan shaqalaqty qurylys alańyna tastap ketken áıel endi balasyn qaıta baýyryna basqysy keledi. Bul jóninde Oral qalasyndaǵy «Meıirim» balalar úıiniń dárigeri málim etti, dep habarlaıdy QazAqparat tilshisi.
Batys Qazaqstan oblystyq «Meıirim» mamandandyrylǵan bóbekter úıiniń dárigeri Gúlnár Súndetovanyń aıtýynsha, náresteniń anasy balalar úıine jıi kelip, ulyn ózimen alyp ketkisi keletinin aıtqan. Al dúnıe esigin asha sala tastandy atanǵan sábıdiń taǵdyryna endi mamandar alańdaýly. Bireýler sábı anasymen birge ósýi tıis dep sanasa, endi biri balany anasyna berýge qarsy. Tipti bir jarym aılyq sábıdi ólim aýzynda tastap kete barǵan áıeldi ata-analyq quqyǵynan aıyrý kerek dep sanaıdy.
Osyǵan baılanysty Taldyqorǵan qalalyq bilim bólimi, balalardyń quqyǵyn qorǵaý sektorynyń meńgerýshisi Ámir Tuıaqbaevtyń pikirin bilgen edik.
«Meniń oıymsha balany anasyna berýge bolmaıdy. Sebebi anasy ony qurylys nysanyna qaldyryp, ómirine qaýip tóndirdi. Bul jaıttyń qaıtalanbasyna kim kepil? Sondyqtan óz basym balany anasyna berýge túbegeıli qarsymyn», - deıdi Ámir Tuıaqbaev.
Esterińizge sala keteıik, osydan bes aı buryn Oral qalasyndaǵy qurylys alańynan jańa týǵan náreste tabylǵan bolatyn. Shyryldap jatqan shaqalaqty keshkilik ýaqytta aýmaqty tekserip júrgen kúzetshi taýyp alǵan. Artynan sábıdiń anasy 21 jastaǵy áıel ekeni anyqtaldy. Endi tastandy balanyń taǵdyryn sot sheshedi. Al qazir sábı kóp-kórim ósip qalǵan. Bes jarym aılyq ul bala ózdiginen basyn ustap, oıynshyqtarǵa da eleńdeıdi.
Sábı «Meıirim» bóbekter úıinde tárbıelenýde.
