Oralda saılaý sanıtarlyq talaptarǵa saı ótýde – Berkinǵalı Ǵabdelov

ORAL. QazAqparat – Oralda saılaý sanıtarlyq talaptarǵa sáıkes ótýde. Bul týraly «Aýǵan soǵysy múgedekteri jáne ardagerleriniń BQO qoǵamy» qoǵamdyq birlestiginiń tóraǵasy Berkinǵalı Ǵabdelov málim etti, dep habarlaıdy QazAqparat tilshisi.

Onyń aıtýynsha, saılaý ýchaskelerinde turǵyndar daýys berip, óz tańdaýlaryn jasaýda.

«Bıyl Qadyr Myrza Álı shaǵynaýdanyndaǵy oqýshylar saraıynda ornalasqan óz ýchaskemizge daýys berdik. Baıqaǵanym,ýchaskede sanıtarlyq talaptar tolyq saqtalǵan. Daýys berip jatqan halyqtyń kóńil-kúıi kóterińki. Merekedegideı, bir-birine ıgi tilekterin aıtyp jatyr. Báriniń maqsaty bir – elimiz tynysh bolsyn, mártebesi bıikteı bersin. Halqymyz óz mádenıetteriniń joǵary ekendigin kórsetýde. Mádenıeti myqty eldiń tárbıesi, ónegesi, ımandylyǵy men rýhy berik bolady. Qazaqstanda qoǵamnyń barlyq toptary úshin tolyq jaǵdaı jasalǵan. Ózimiz ınternatsıonalıst jaýynger, úshinshi toptaǵy múgedek bolsaq ta, qatardan qalǵan emespiz, qoǵam ómirine belsene aralasyp kelemiz», - dedi QazAqparat tilshisine Berkinǵalı Ǵabdelov.

Oral qalasyndaǵy H.Dospanova atyndaǵy №30 mektepte ornalasqan №435 saılaý ýchaskesinde de daýys berý qalypty ótýde.

Ýchaskelik saılaý komıssııasynyń tóraıymy Gúlshat Bısenǵalıevanyń aıtýynsha, bıyl 2609 saılaýshy tirkelgen.

«Baıqaýshylardy tirkep, jumysymyzdy ýaqtyly, talapqa saı bastap kettik. Túske deıin 500-ge jýyq saılaýshy daýys berdi. Densaýlyq jaǵdaılaryna baılanysty kele almaıtynyn aıtyp, 8 adam ótinish jasady. Olardyń úılerine baramyz», dedi Gúlshat Aqylbekqyzy.