Oralda saýda úıindegi 50 sharshy metr býtık órtendi
ORAL. QazAqparat – Oralda «Azıza» saýda úıinde órt shyqty, dep habarlaıdy QazAqparat tilshisi.
BQO TJ departamenti azamattyq qorǵaý salasynda apat qaýpin tómendetý jáne baqylaý basqarmasynyń bastyǵy Erlan Tóregeldıevtiń aıtýynsha, oqıǵa 4 qańtar kúni saǵat 21.27-de Qurmanǵazy kóshesi, 69-mekenjaıda bolǵan.
Atalmysh saýda úıinde býtık otqa orandy. Aýmaǵy 50 sharshy metrdi quraǵan órt 32 adam, 10 tehnıkanyń kúshimen saǵat 22.26-da oqshaýlanyp, saǵat 22.43-te sóndirildi.
Órttiń shyǵý sebebi, kináli adamdar, keltirilgen shyǵyn anyqtalýda.
«Zardap shekkender joq. Órt shyqqan kezde avtomatty qondyrǵy belgi berdi. Sonyń nátıjesinde ottyń keń jaıylýyna jol berilgen joq. Oqıǵa ornynda jyljymaly órt synaq zerthanasy jumys jasaýda», dedi QazAqparat tilshisine E.Tóregeldıev.
Aıta keteıik, ótken jyldyń jeltoqsan aıynda órtke qarsy sharalardy oryndamaǵany úshin Oral qalasy mamandandyrylǵan ákimshilik sotymen «Azıza» saýda úıi basshylyǵyna 100 AEK kóleminde aıyppul salynǵan bolatyn.
