Oralda saýda ortalyqtary tekserildi
ORAL. QazAqparat - Kemerovo qalasyndaǵy qaıǵyly oqıǵadan keıin Batys Qazaqstanda barlyǵy 55 nysan tekserýden ótkizilmek, dep habarlaıdy QazAqparat tilshisi.
Búgin BQO TJ departamenti QR Memlekettik qyzmet isteri jáne sybaılas jemqorlyqqa qarsy is-qımyl agenttigi BQO boıynsha departamentimen birlese otyryp, Oraldaǵy «Sıtı tsentr» saýda ortalyǵynyń qaýipsizdigin tekserdi.
Órt bola qalǵan jaǵdaıda ne istelip, qandaı sharalar alynatyny, adamdardyń syrtqa qalaı shyǵatyny, soǵan ortalyqtyń daıyndyǵy súzgiden ótkizildi.
BQO TJ departamenti órt qaýipsizdigi salasyndaǵy baqylaý jáne profılaktıkalyq qyzmet basqarmasynyń bastyǵy, azamattyq qorǵaý podpolkovnıgi Erlan Tóregeldıev atalmysh ortalyqqa budan buryn da tekseris júrgizilgendigin jetkizdi. Sol kezde anyqtalǵan kemshilikterdiń birqatary oryndalǵan. Alaıda ortalyq órt qaýipsizdigi talaptaryna tolyqtaı saı dep aıtý qıyn.
«Tekseris bir kúnmen bitpeı, saýda ortalyqtary budan bylaı da baqylaýda bolady. Shara barysynda belgili bolǵan olqylyqtar der kezinde joıylmaǵan jaǵdaıda saýda ortalyqtarynyń ıeleri ákimshilik jaýapkershilikke tartylyp, jeke kásipkerlik deńgeıine qaraı 500 AEK kólemine deıin aıyppul salynady. Eń bastysy, adamdardyń qaýipsizdigin qamtamasyz ete bilýge tıistimiz», dedi E.Tóregeldıev.
«Eki aı merzimde oblysta barlyǵy 55 nysan tekseriledi. Sonymen qatar jeke bilim berý uıymdaryn tekserý kózdelýde. Bizdiń qatysýymyzdyń sebebi - tekseristerdiń durys ótýin, sonymen birge kásipkerlerdiń quqyǵyna nuqsan kelmeýin qadaǵalaý. Kópshilikke ortaq másele bolǵandyqtan, buǵan úkimettik emes uıymdar músheleri, jurtshylyq ókilderi atsalysa alady», dedi QR Memlekettik qyzmet isteri jáne sybaılas jemqorlyqqa qarsy is-qımyl agenttigi BQO boıynsha departamentiniń basqarma basshysy Birjan Haırýllın.
