Oralda sarapshy jalǵan qorytyndy bergeni úshin sottaldy
ORAL. KAZINFORM – Oral qalalyq soty Batys Qazaqstan oblysy Sot saraptamalary ınstıtýtynyń sarapshysy M. Jonysovqa qatysty aıyptaý úkimin shyǵardy.
Qazaqstan Bas prokýratýrasynyń málimetinshe, sarapshy óz qorytyndysynda máıitte dene jaraqattarynyń joq ekenin jáne ólim sebebin shirý ózgeristeri saldarynan anyqtaý múmkin emestigin kórsetken. Degenmen, keıingi eksgýmatsııadan keıin Astana qalasynyń sot-medıtsınalyq sarapshylary ótkizgen komıssııalyq saraptamanyń nátıjesinde máıitte tiri kezinde alynǵan birneshe dene jaraqaty, onyń ishinde qabyrǵalar men til asty súıeginiń synýy anyqtaldy.
M. Jonysov kinásin moıyndamaǵanymen, memlekettik aıyptaýshy sotta dáleldi jáne naqty aıǵaqtardy usyndy.
Sot sarapshynyń bastapqy qorytyndysynyń shyndyqqa sáıkes kelmeı, tergeý organdaryn adastyrǵanyn anyqtady. Osyǵan baılanysty, sot ony Qazaqstan Respýblıkasynyń Qylmystyq kodeksiniń 420-baby 1-bóligi boıynsha (sarapshynyń kórineý jalǵan qorytyndy berýi) kináli dep tanyp, 3 jyl 2 aı 12 kúnge bas bostandyǵyn shekteý jazasyn taǵaıyndady.
Úkim áli zańdy kúshine engen joq.
Buǵan deıin Mańǵystaýda naýqastyń ólimine sebepshi bolǵan «emshi» sottalǵanyn jazǵan edik.
