Oralda sanıtarlyq talaptardy saqtamaǵan 11 nysannyń qyzmeti toqtatyldy
ORAL. QazAqparat – Oralda sanıtarlyq talaptardy saqtamaǵan 11 nysannyń qyzmeti toqtatyldy, dep habarlaıdy QazAqparat tilshisi.
BQO taýarlar men kórsetiletin qyzmetterdiń sapasy men qaýipsizdigin baqylaý departamentiniń baspasóz qyzmeti málim etkenindeı, indetpen kúres kezinde qaladaǵy saýda jáne basqa qyzmet etý oryndarynyń QR bas memlekettik sanıtarlyq dárigeri qaýlysynyń talaptaryn buzǵany anyqtaldy.
Atap aıtqanda, «Qurylysshy» shaǵynaýdanynda «Solnyshko», «Prodýkty», Gagarın kóshesinde «Radýga», Eýrazııa dańǵylynda «Ovoşı-frýkty», «Mınımarket» azyq-túlik, D.Qonaev shaǵynaýdanynda gúl dúkeninde, D.Nurpeıisova kóshesinde atele men «Rýslana» shashtarazy, Ábilqaıyr han kóshesinde «Dına» shashtarazy, Eýrazııa dańǵylynda «Dostar» kafesi jáne N.Nazarbaev dańǵylynda ornalasqan «Sabına» sán salonynda buzýshylyqtar anyqtaldy.
Kemshilikterdiń deni azyq-túlik ónimderin oramaǵa salmaı, ashyq kúıinde satýǵa, adamdardyń kóptep jınalýyna, dezınfektsııalyq quraldardyń, kelýshiler qolyn jýatyn antıseptıktiń bolmaýyna baılanysty bolyp keledi. Sondaı-aq birqatar qyzmetkerler maska, qolǵapsyz jumys istegen. Sonymen qatar jumysqa kiriser aldynda qyzmetkerlerdiń densaýlyq jaǵdaıy men qyzýy ólshengeni jónindegi derekter engiziletin jýrnaldyń joqtyǵy belgili boldy.
Budan basqa turǵyndardan «Aıajan» saýda úıi, «Altyn alma» jáne «Mıhaıl» bazarlarynda sanıtarlyq talaptardyń saqtalmaıtyny týraly shaǵym túsip, sonyń negizinde tekserýler júrgizildi. Nátıjesinde buzýshylyqtar anyqtalyp, is sotqa jiberildi.
Oǵan qosa Oral qalasy taýarlar men kórsetiletin qyzmetterdiń sapasy men qaýipsizdigin baqylaý basqarmasy jeke tulǵalarǵa qatysty QR Ákimshilik quqyqbuzýshylyq kodeksi 462-baby 3-bóligine (memlekettik baqylaý jáne qadaǵalaý organdary (laýazymdy adamdar), memlekettik organdardyń laýazymdy adamdary ózderiniń quzyreti sheginde bergen zańdy talaptardy nemese nusqamalardy, usynýlardy, qaýlylardy oryndamaý nemese tıisinshe oryndamaý) sáıkes 30 hattama toltyrdy. Materıaldar Oral qalasy mamandandyrylǵan ákimshilik sotyna joldandy.
Basqarma basshysy Mádenıet Tanaýov qazirgi tańda isterdiń qaralyp jatqanyn jetkizdi.
Eske sala keteıik, budan buryn Batys Qazaqstanda demalys kúnderi bazarlar men dámhanalar jabylyp, avtobýstar júrmeıtinin jazǵan bolatynbyz.
