Oralda sambodan QR V jazǵy spartakıadasy márege jetti

Tórt jylda bir ret ótetin aıtýly dodaǵa respýblıka óńirlerinen 16 komanda quramynda 235 samboshy qatysyp, baq synady.

Eki kúnge sozylǵan jarys qorytyndysynda jalpy esepte BQO quramasy jeńimpaz atandy. Atyraýlyqtar ekinshi, qaraǵandylyqtar úshinshi orynǵa ıe boldy. Aqtóbelikter tórtinshi orynǵa taban tiredi.

Sonyń ishinde áıelder arasynda Atyraý, Batys Qazaqstan, Almaty oblysy, erlerden BQO, Atyraý, Aqtóbe, jaýyngerlik sambodan BQO, Qaraǵandy, Atyraý úzdik úshtikten tabyldy.

Jarystyń bas tóreshisi, Qazaqstannyń eńbek sińirgen jattyqtyrýshysy Asylbek Qulmaǵambetovtiń aıtýynsha, spartakıadanyń deńgeıi joǵary boldy.

«Batys Qazaqstan oblysy sambodan óziniń myqty ekendigin taǵy da tanytty. Munda KSRO kezinen beri kúrestiń osy túriniń jaqsy damyǵany belgili. Mine, sol dástúrdi keıingi býyn jalǵastyryp keledi. Bıyl sambodan álem chempıonaty qarasha aıynda Seýlde ótedi. Soǵan baılanysty bas bapker Qaırat Shańǵaraev bastaǵan mamandar jattyqtyratyn el quramasy Semeıde ótken Qazaqstan chempıonatynda anyqtaldy. Spartakıadany da dúnıejúzilik dodaǵa daıyndyqtyń bir satysy dep esepteýge bolady», dedi QazAqparat tilshisine A.Qulmaǵambetov.

Jekeleı salmaqta myna sportshylar chempıon atandy.

Erler: Bolatbek Raıymqulov (52 kg, BQO), Qaıyrberdi Aıdynbaı (57 kg), Parasat Jumabaı (62 kg, ekeýi de Atyraýdan), Serikbaı Nyǵmet (68 kg, BQO), Naýryzbek Maılashov (74 kg, Atyraý), Rýslan Jarqynbaev (82 kg, ShQO), Ádilet Mısın (90 kg), Shyńǵys Shoqpytov (100 kg, ekeýi de Aqtóbeden), Temirlan Kólbaı (+100 kg, BQO).

Áıelder: Aıjan Jylqybaeva (48 kg, Túrkistan), Áıgerim Telemgenova (52 kg), Gúldana Álmuhanbetova (56 kg, ekeýi de BQO-dan), Dınara Jumabaeva (60 kg, Almaty oblysy), Gúlderaıym Almaǵanbet (64 kg, Qyzylorda), Marııam Ordabaeva (68 kg, Almaty q.), Dildásh Kúrishbaeva (72 kg, Almaty o.), Elmıra Samıǵollaeva (80 kg), Qaljan Taıjanova (+80 kg, ekeýi de Atyraýdan).

Jaýyngerlik sambo: Rýslan Qarajigitov (52 kg, Qyzylorda), Serikjan Túsipov (57 kg, Atyraý), Qazbek Supyǵalıev (62 kg, BQO), Erlan Mahmudov (68 kg, Jambyl), Dáýren Qamash (74 kg, Almaty q.), Temirlan Ihsanǵalıev (82 kg, BQO), Sergeı Kotın (90 kg, Qaraǵandy), Ádilet Qabýlov (100 kg, BQO) jáne Sergeı Zýbkov (+100 kg, Qaraǵandy).

Spartakıadaǵa jaýyngerlik sambodan álem chempıony Temirlan Ihsanǵalıev, ótken jylǵy Azııa oıyndarynyń jeńimpazy Dildásh Kúrishbaeva jáne basqa aıtýly dodalarda top jaryp júrgen ataqty sportshylardyń qatysqanyn aıta keteıik.