Oralda salynyp jatqan úıden qurylysshy qulap, mert boldy
ORAL. QazAqparat – Oralda salynyp jatqan úıden qurylysshy qulap, mert boldy, dep habarlaıdy QazAqparat tilshisi.
BQO densaýlyq saqtaý basqarmasynyń baspasóz qyzmeti málim etkenindeı, qaıǵyly oqıǵa búgin Rýjeınıkov kóshesi boıynda «Bolashaq-T» JShS salyp jatqan kópqabatty úıde boldy.
Jedel járdem saǵat 03.15-te shaqyryldy.
Osynda montajshy bolyp jumys isteıtin Aqjaıyq aýdanynyń 24 jastaǵy turǵyny 5-qabattan qulap ketken. Marqum jedel járdem kelgenge deıin kóz jumdy.
BQO polıtsııa departamentiniń baspasóz qyzmeti oqıǵanyń Rýjeınıkov kóshesi 14-mekenjaıynda bolǵanyn rastap, tolyq málimettiń keıin beriletinin jetkizdi.
Qazirgi kezde Oral qalasy polıtsııa basqarmasy tergeý amaldaryn júrgizýde.
Eske sala keteıik, budan buryn Oralda mektep janynda «KamAZ» ben jeńil kólik soqtyǵysyp, júrgizýshiniń jansaqtaý bóliminde jatqanyn jazǵan bolatynbyz.
