Oralda salynyp jatqan jaıly mektep qurylysy nelikten kesheýildedi
ORAL. KAZINFORM — Oral qalasynda Jáńgir han kóshesi boıynda 600 oryndyq mektep qurylysy ótken jyly bastalǵan edi.
Bastapqyda «Jaıly mektep» (qazir «Keleshek mektepteri») jobasy aıasynda qolǵa alynǵan mektep qurylysyn 2024 jyldyń sońynda bitirý kózdelgenimen, ol sozylyp ketti.
Osynyń sebebin bilý úshin Kazinform tilshisi tapsyrys berýshi «Samruk-Kazyna Construction» AQ-ǵa resmı saýal joldady.
Kompanııa baspasóz qyzmetinen málim etkendeı, merdiger — «Jaıyq jaryǵy» JShS.
Jergilikti atqarýshy organdarmen jaıly mekteptiń jer ýchaskesi aýystyrylǵandyqtan, kompanııamen kelisim-shart tek 2023 jyldyń qarashasynda jasalyp, qurylys jumystaryna daıyndyq bastaldy.
— Qystaǵy qolaısyz aýa raıyna baılanysty nysan irgetasyn quıý 3 aıǵa shegerilip, 2024 jyldyń kókteminde jalǵasyn tapty. Búginde qurylys-montaj jumystary 65 paıyzǵa aıaqtalǵan. Qazir nysannyń qasbetin qaptaý, ishki ınjenerlik jelilerdi tartý, ishki árleý jáne abattandyrý boıynsha sharýa atqarylyp jatyr. Bilim oshaǵy boıynsha jumys bıylǵy jyldyń 30 tamyzyna deıin tolyq aıaqtalyp, jańa oqý jylynda nysan esigin aıqara ashady, — delingen resmı jaýapta.
Samruk-Kazyna Construction-nan túsken málimetke qaraǵanda, «Keleshek mektepteri» jobasy aıasynda Batys Qazaqstan oblysynda atalmysh bilim nysanyna qosa Báıterek aýdany Dostyq aýylyndaǵy 1 200 oryndyq jáne Baıqonystaǵy 600 oryndyq mektep te 30 tamyzǵa deıin qoldanysqa tapsyrylady.
Sondaı-aq Bórli aýdany Pýgachev aýyly men Aqsaı qalasyndaǵy M.Yqsanov kóshesindegi 300 oryndyq mektepter 30 qazanǵa deıin paıdalanýǵa berilmekshi.
Sol sekildi Aqsaı qalasynyń 13-shaǵynaýdanyndaǵy 900 oryndyq mektep qurylysy bıylǵy 15 jeltoqsanǵa deıin aıaqtalmaqshy.
Oralda Jáńgir han kóshesi boıynda boı kóterip jatqan mektepte «Zachaganskıı» baý-baqsha seriktestiginde turatyn balalar oqıtyn bolady.
Seriktestik turǵyndary jańa bilim oshaǵynyń ashylý sátin asyǵa kútýde. Óıtkeni balalardyń Zachagan kentindegi Á. Moldaǵulova atyndaǵy № 38 mektep-lıtseıine jáne Bortaýdaǵy № 18 mektepke qatynap oqýy qıyndyq keltirip keledi.
Á. Moldaǵulova atyndaǵy № 38 mektep-lıtseıiniń dırektory Aqushtap Súıinǵalıevanyń aıtýynsha, «Zachaganskıı» baý-baqsha seriktestiginen 1 070 oqýshy bilim alyp júr.
Eske sala keteıik, budan buryn Batys Qazaqstanda «Jaıly mektep» jobasy qalaı júzege asyp jatqanyn jazǵan edik.