Oralda sadaq atýdan Qazaqstan chempıonaty márege jetti
ORAL. QazAqparat - Oral qalasynda eresekter arasynda sadaq atýdan Qazaqstan chempıonaty márege jetti, dep habarlaıdy «QazAqparat» tilshisi.
Sadaq atýdan BQO quramasynyń aǵa bapkeri Vıtalıı Shkokovtyń aıtýynsha, bastapqy aınalymda (70+70 metr) klassıkalyq tásilden áıelder arasynda Lýıza Sadyqova, erlerden Oıbek Saıdıev (ekeýi de OQO-dan) chempıon atandy. Kompaýndtan erlerden Pavel Fısher, áıelderden Nına Dýdareva (ekeýi de Almatydan) birinshi orynǵa ıe boldy.
Komandalyq esepte klassıkalyq tásilden áıelder arasynda Ońtústik Qazaqstan, Almaty jáne Batys Qazaqstan oblystarynyń, erlerden Almaty, Ońtústik Qazaqstan jáne Batys Qazaqstan oblystarynyń, kompaýndtan áıelder arasynda Almaty qalasy men Ońtústik Qazaqstan jáne Almaty oblystarynyń, erlerden Ońtústik Qazaqstan men Almaty oblystarynyń, sondaı-aq Almaty qalasynyń ókilderi sáıkesinshe alǵashqy úsh orynǵa kóterildi.
Sonymen qatar, mıksten klassıkalyq tásilden Ońtústik Qazaqstan, Almaty jáne Batys Qazaqstan oblystarynyń, kompaýndtan Almaty qalasy men Ońtústik Qazaqstan jáne Almaty oblystarynyń komandalary sáıkesinshe júldege ilikti.
Olımpıadalyq aınalym jattyǵýynan klassıkalyq tásilden Farıda Tókebaeva (Almaty oblysy), erlerden Oıbek Saıdıev (OQO), kompaýndtan Nına Dýdareva (Almaty) men Sergeı Hrıstıch (Almaty oblysy) jeńis tuǵyryna kóterildi.
Komandalyq esepte kompaýndtan erlerden OQO, Almaty oblysy, BQO, áıelderden Almaty, OQO, Pavlodar, mıksten Almaty, OQO, Astana, klassıkalyq tásilden áıelderden OQO, Almaty oblysy, BQO, erlerden Almaty oblysy, OQO, BQO, mıksten OQO, Almaty oblysy, BQO ókilderi júldeli oryndarǵa ıe boldy.
Paralımpadashylar arasynda (70+70 metr) Almaty oblysynan kelgen Qaırat Sarqulov jeńimpaz atansa, áıelderden BQO quramasynyń músheleri Lıýbov Dombrına, Aınur Jaqsylyq jáne Oksana Pırog alǵashqy úsh oryndy ózara bólisti.
Aıta keteıik, jarys jeńimpazdary aldaǵy kúzde Mehıko qalasynda ótetin álem chempıonatyna joldama aldy.
