Oralda sábıin tastap ketken áıelge qatysty úkim shyǵaryldy
ORAL. QazAqparat - Oralda sábıin qurylys nysanynda tastap ketken 21 jastaǵy áıelge qatysty úkim shyǵaryldy, dep habarlaıdy «QazAqparat» tilshisi.
BQO sotynyń baspasóz qyzmetinen túsken málimetke qaraǵanda, Oral qalalyq soty ony QR QK 119-baby 1-bóligine (qaýipti jaǵdaıda qaldyrý) sáıkes aıypty dep tanydy. Qylmystyq quqyqbuzýshylyqqa barǵan áıeldi 100 saǵat qoǵamdyq jumysqa tartý jóninde jaza kesildi.
Qazirgi kezde sábı balalar úıinde tárbıelenýde. Onyń taǵdyry qamqorshylyq jáne qorǵanshylyq organynyń qorytyndysyna sáıkes sheshiletin bolady. Jasaǵan áreketine ókingen anasy shaqalaqty óziniń baýyryna basqysy keletinin málimdegen edi.
Eske sala keteıik, 26 maýsym kúni keshkisin 4-shaǵynaýdandaǵy № 24 orta mektep ǵımaraty janynda salynyp jatqan kottedjden dúnıege kelgenine shamamen eki aptadaı bolǵan sábı tabylǵan edi. Keıin shaqalaqty 21 jastaǵy anasynyń tastap ketkeni anyqtalǵan bolatyn.
