Oralda sábıin qurylys nysanyna tastap ketken áıel tabyldy
ORAL. QazAqparat - Búgin izdestirý jumystary barysynda sábıin qurylys nysanynda tastap ketken áıel tabyldy, dep habarlaıdy «QazAqparat» tilshisi.
Oral qalalyq ishki ister basqarmasy jergilikti polıtsııa qyzmetiniń aǵa ınspektory, polıtsııa maıory Dınara Ábdilqalyqovanyń aıtýynsha, Oral qalasynyń 1996 jylǵy turǵyny oqymaıdy jáne esh jerde jumys jasamaıdy. Onyń túsindirýinshe, balany 9 maýsym kúni qala perzenthanalarynyń birinde dúnıege keltirgen. Jeke sebepterge baılanysty sábıin balalar úıine bergisi kelgen. Áıtse de 4-shaǵynaýdannan ol úıdi taba almaǵannan keıin salynyp jatqan kottedjge tastap ketken.
Bul oqıǵa týraly onyń týma-týysqandary bilmegen. Óıtkeni qyz aýdandardyń birine ketip, «qonaqtamyn» dep ótirik aıtqan.
QR QK 119-baby 1-bóligine sáıkes (qaýipti jaǵdaıda qaldyrý) atalǵan qylmystyq is-áreketi úshin qyzǵa 100 AEK kóleminde aıyppul salynýy nemese túzetý jumystaryna jegilýi ıá bolmasa 45 táýlikke qamalýy múmkin. Eger sábı zardap shekkende, osy baptyń 2-bóligine sáıkes jazasy aýyrlap, 5 jylǵa deıin bas bostandyǵynan aıyrylýy múmkin edi.
Eske sala keteıik, 26 maýsym kúni keshkisin 4-shaǵynaýdandaǵy № 24 orta mektep ǵımaraty janynda salynyp jatqan kottedjden sábı tabylyp, ol oblystyq kópbeıindi balalar aýrýhanasyna jatqyzylǵan bolatyn. Sábıdiń deni saý, jaǵdaıy qalypty.
