Oralda S.Berdiqulovty eske alýǵa arnalǵan respýblıkalyq spartakıada márege jetti (FOTO)
ORAL. QazAqparat - Jeksenbi kúni Oral qalasynda qazaq jýrnalıstıkasynyń negizin qalaǵan qalamger, jazýshy, qoǵam qaıratkeri Seıdahmet Berdiqulovty eske alýǵa arnalǵan BAQ qyzmetkerleri arasynda ІІ respýblıkalyq spartakıada márege jetti.
Jarysqa Qazaqstannyń jeti oblysy men Almaty qalasynan jáne respýblıkalyq telearnalardan 12 komanda quramynda 150-den astam adam qatysyp, sporttyń toǵyz túri (shaǵyn fýtbol, júzý, ústel tennısi, voleıbol, basketbol, jeńil atletıka, qol kúresi, gir kóterý, shahmat) boıynsha synǵa tústi.
Spartakıada qorytyndysynda jalpykomandalyq esepte «Habar» telearnasy jeńimpaz atansa, «Qazaqstan» telearnasy ekinshi, Aqtóbe oblysynyń komandasy úshinshi oryndy ıelendi.
Jarysty uıymdastyrǵan QR Mádenıet jáne sport mınıstrligi Sport jáne dene shynyqtyrý isteri komıtetiniń baspasóz hatshysy Baqytbek Hamıttiń aıtýynsha, S.Berdiqulovty eske alýǵa arnalǵan BAQ qyzmetkerleri arasynda shaǵyn fýtbol týrnıri on jyldan astam ýaqyt boıy ótkizilip keldi. Sońǵy jyldary onyń aıasyn keńeıtý maqsatynda sharalar qolǵa alyndy. Alǵashqy spartakıada Shymkent qalasynda 2011 jyly ótken bolatyn. Endi, mine, jarys estafetasyn batysqazaqstandyqtar qabyldap aldy. Aldaǵy ýaqytta da spartakıada bes jyl saıyn uıymdastyrylyp turatyn bolady. Bul Elbasymyzdyń Qazaqstan halqynyń keminde 30 paıyzyn sportpen shuǵyldanýǵa tartý jónindegi tapsyrmasyna tolyq saı keledi. Basty maqsat sporttyń buqaralylyǵyn arttyryp, bolashaqta 30 paıyzdan da asyryp, damyǵan elderdiń qataryna jetýge baǵyt ustaý bolyp tabylady.
Aıta keteıik, jarysqa qatysýshylar tarapynan syn da aıtylmaı qalǵan joq. Bul - keıbir komandalardyń jýrnalısterdi emes, óz qatarlaryna basqa adamdardy, tipti kásibı oıynshylarǵa deıin qosyp, alańǵa shyǵarýy. Mundaı «bas aýrý» shaǵyn fýtbol týrnıri uıymdastyryla bastaǵannan beri sozylyp keledi. Tyıylatyn ázirge túri joq. Shyn mánisinde alańda BAQ qyzmetkerleri ter tógip, bar sheberligin salyp oınamasa, onyń nesi qyzyq, shetten adamdardy qosyp, ótirik báıge alyp, arzan bedel jınaýdyń qanshalyqty qajeti bar!? Ras, mundaı talas týyndaǵan sátte uıymdastyrýshylar tarapynan ár qatysýshyǵa jeke jáne qyzmet kýáligin kórsetý talap etiledi. Biraq birqatar komandalar qyzmet kýáligi emes, anyqtamany kórsetip, jarysqa qosylyp júr. Mundaı «anyqtamany» kez kelgen jerden alýǵa bolatyny túsinikti. Sol adamnyń komanda jasaqtalǵan mekemede jumys jasaıtynyn anyqtaıtyn basqa da joldaryn nege izdestirmeske!? Buǵan aldaǵy ýaqytta qatań tyıym salyp, batyl tosqaýyl qoıatyn mezgil jetti.
