Oralda respýblıkalyq dombyrashylar baıqaýynyń jeńimpazdary anyqtaldy
ORAL. QazAqparat - Oraldaǵy Jastar mádenıet úıinde Qurmanǵazy Saǵyrbaıulynyń 200 jyldyǵyna arnalǵan respýblıkalyq dombyrashylar baıqaýynyń jeńimpazdary anyqtaldy, dep habarlaıdy QazAqparat tilshisi.
Eki kúnge sozylǵan aıtýly kúı dodasyna Astana, Almaty qalalary men Qyzylorda, Atyraý, Qostanaı, Túrkistan jáne Batys Qazaqstan oblysynan barlyǵy 18 úmitker qatysyp, baq synady.
Baıqaýdyń alǵashqy kezeńinde dombyrashylar Qurmanǵazynyń «Baıjuma», «Aqbaı», Qazanǵaptyń «Jurtta qalǵan», Táttimbettiń «Sarjaılaý», Dáýletkereıdiń «Ańshylyq» kúılerin tartty. Ekinshi kezeńde Qurmanǵazynyń «Terisqaqpaı», «Arba soqqan», Orynshanyń «Baıjuma», Esirdiń «Aqjarma», Áshimtaıdyń «Qońyr qaz» kúılerin naqyshyna keltire oryndady. Úzdikter iriktelip, fınaldyq aınalymǵa joldama aldy.
Saıys qorytyndysynda Batys Qazaqstannyń Bókeı ordasy aýdanynan túlep ushqan Qurmanǵazy atyndaǵy Qazaq ulttyq konservatorııasynyń 4-kýrs stýdenti Jasqaırat Muqashev bas júldeni jeńip aldy. Oraldyq Jasulan Zınedenovke birinshi, almatylyq Aqbóken Temirge ekinshi oryn buıyrdy. Taǵy bir almatylyq Qaırat Jumaǵalıev úshinshi júldege ıe boldy.
Qazylar alqasynyń tóraǵasy, belgili dombyrashy, QR eńbek sińirgen mádenıet qyzmetkeri, «Qurmet» ordeniniń ıegeri, Ǵ.Qurmanǵalıev atyndaǵy BQO fılarmonııasynyń ártisi Ermek Qazıevtiń aıtýynsha, baıqaý birshama ósip kele jatqan jas oryndaýshylardyń bar ekendigin kórsetti. Endi olar osy ulttyq ónerdi odan ári damytý jolynda kóbirek izdenip, erinbeı eńbektene berýleri kerek.
