Oralda respýblıkalyq aqyndar aıtysynyń jeńimpazdary anyqtaldy
Ólketanýshy, jazýshy-jýrnalıst, aqyn Qaıyrjan Hasanovtyń 80 jyldyǵyna arnalǵan jyr dodasyn Qadyr Myrza Álı atyndaǵy oblystyq mádenıet jáne óner ortalyǵy uıymdastyrdy. Oǵan Qazaqstan óńirlerinen barlyǵy 18 aqyn qatysty.
Aıtysty júrgizgen belgili aqyn, halyqaralyq «Aıtys aqyndary men jyrshy-termeshiler» odaǵynyń basqarma tóraǵasy Júrsin Erman atap ótkenindeı, saıysqa nebir dúldúlder túgelge jýyq keldi. Olardyń arasynda «Altyn dombyra» aıtysynyń birneshe jeńimpazy bar.
«Qaratóbe – talaı alyptar dúnıege kelgen qasıetti meken. Úsh júzge án ozdyrǵan sal Muhıt, ataqty ánshi Ǵarıfolla Qurmanǵalıev, kompozıtor Eskendir Hasanǵalıevti atasa da, jetkilikti. Mine, sondaı qasıetti topyraqta týǵan Qaıyrjan Hasanovtyń ómir boıy ólke derekterin jınap, qaǵazǵa túsirip, qattap ketýi – keıingi urpaq úshin úlken úlgi», dedi oblys ákimi Ǵalı Esqalıev.
«Bul jolǵy aıtystyń jóni bólek. Osy saparymyzda ólketanýshy, shejireshi, aqyn, jýrnalıst Qaıyrjan Hasanovtyń qurmetine týǵan jeri – Qaratóbe aýdanynda zamanaýı qalypta salynǵan «Alash jáne Qaıyrjan Hasanov» atty tarıhı-ólketaný mýzeıin kórdik. Ólketanýshynyń uldary Erjan men Nurjan Hasanov 100 mln teńgege sol mýzeıdi salyp, el ıgiligine tegin berse, búgingi aıtysqa da demeýshi bolyp otyr. Qaıyrjan Hasanovtaı qarapaıym adamnyń tutas bir ınstıtýttyń jumysyn atqaryp, eldiń tarıhyn «Alash» qozǵalysy jóninde tyń derektermen tolyqtyryp, qanshama eńbek qaldyrǵanyna tánti boldyq», dedi J.Erman.
Saıys qorytyndysynda qazylar alqasynyń sheshimimen túrkistandyq Bekarys Shoıbekov bas júldeni (1,5 mln teńge) jeńip alsa, birinshi júlde (1 mln teńge) batysqazaqstandyq Talǵat Myqıǵa buıyrdy.
Sondaı-aq batysqazaqstandyq Raıymbek Ótepov, qyzylordalyq Muhtar Nııazov, almatylyq Shuǵaıyp Sezimhan ekinshi (600 myń teńgeden), almatylyq Rústem Qaıyrtaıuly, qostanaılyq Aıbek Qalıev jáne aqtóbelik Nurbol Jaýynbaev úshinshi (500 myń teńgeden) orynǵa kóterildi.
Batysqazaqstandyq Jansaıa Mýsına Qaıyrjan Hasanov atyndaǵy syılyqpen (1 mln teńge) marapattaldy. Atyraýlyq Shalqarbaı Іzbasarov pen túrkistandyq Birjan Baıtýov arnaıy syılyqty (450 myń teńgeden) enshiledi. Qalǵan aqyndarǵa 400 myń teńgeden yntalandyrý syılyqtary tabys etildi.
«Aıtys joǵary deńgeıde ótti. Aıtys – qazaqtyń rýhy, basqalarǵa kórsetetin aıbarymyz, susymyz. Qazaqtyń myqty degen aqyndary Qaıyrjan Hasanovqa ózderiniń jyly sózderin, shyn sózderin arnady, buǵan osynda jınalǵan el rıza boldy. Qaıyrjan aǵamyz Qaratóbe aýdandyq gazetine uzaq ýaqyt boıy basshylyq etip qana qoımaı, sóz ustaıtyn shákirt tárbıeledi, kónekóz qarııalardan syr tartyp, ólke shejiresin jınaqtaı bildi. Óziniń atasy Tólegen Imanǵazıev zamanynda kózi ashyq Alash qaıratkerleriniń biri boldy. Sol úshin ótken ǵasyrdyń otyzynshy jyldarynyń zobalańyna ushyrap, atylyp ketti.
Qaıyrjan Hasanovtyń sol Alash arystaryn jaryqqa shyǵarý jolynda aıanbaı eńbek etýi de qanmen berilse kerek», - dedi qazylar alqasynyń tóraǵasy, Qazaqstan Jazýshylar odaǵy basqarma tóraǵasynyń orynbasary, «Juldyz» jýrnalynyń bas redaktory Mereke Qulkenov.
Bir aıta ketetin jaıt, bılet satýdan túsken qarajat Qostanaı oblysynda órtten zardap shekken turǵyndar qoryna aýdarylady.
Qaıyrjan Hasanovtyń 80 jyldyǵyna arnalǵan is-sharalar týǵan jeri – Qaratóbe aýdanynda da uıymdastyryldy.
Sýretterdi túsirgen Rafhat HALELOV
