Oralda reseılik bıznes qurylymdary ókilderiniń qatysýymen mal sharýashylyǵyn damytý máselelerine arnalǵan keńes ótkizildi

dep habarlaıdy QazAqparat tilshisi.

Oblystyq aýyl sharýashylyǵy basqarmasynyń bastyǵy Marat Ońǵarbekovtiń aıtýynsha, qazan aıynda Máskeý qalasynda «Altyn kúz» atty aýyl sharýashylyǵy ónimderi men qyzmetteriniń keń kólemdi kórmesi ótkizilgen. Kórme aıasynda iskerlik kezdesýler men tanystyrylym sharalary uıymdastyrylyp, eki el mamandary ózara pikir almasqan bolatyn. Bul júzdesý - sonyń zańdy jalǵasy. Endigi maqsat - Reseımen aradaǵy ózara tıimdi iskerlik jáne ekonomıkalyq qarym-qatynastardy odan ári nyǵaıta berý.

Atalmysh keńeste sóz alǵan Ekaterınbor qalasyndaǵy «Profımılk» kompanııasy bas dırektorynyń mal sharýashylyǵy jónindegi orynbasary Pavel Korshýnov kópten beri Qazaqstannyń Qostanaı jáne basqa oblystarymen iskerlik qarym-qatynas ornaǵanyn aıtty. BQO-ǵa ol tuńǵysh ret at basyn tirep otyr. Jalpy, «Profımılk» kompanııasynyń TMD elderi boıynsha 27 ókildigi bar. Kompanııa kez kelgen sút saýý keshenine nemese oǵan qajetti jabdyqtar men qural-saımandardy sapaly túrde jáne qysqa merzimde ornatyp berýge ázir. Sonyń ishinde sıyrdan basqa ińgen men bıe, eshki saýýǵa arnalǵan qural-saımandar bar. ıAǵnı kompanııa shubat pen qymyz óndirý isine de qolǵabysyn berýge daıar.

Chelıabi qalasynan kelgen qonaqtar, osyndaǵy «Shtaınbaým» kompanııasynyń ókilderi Alekseı Kosenko men Sergeı Ýdashovtar jınalǵandarǵa fılm kórsete otyryp, aǵashtan salynǵan mal qoralarynyń temir-beton jáne ózge qurylys materıaldarynan turǵyzylǵan ǵımarattarǵa qaraǵanda, eki ese arzan, qaýipsiz jáne ekologııalyq jaǵynan taza ekenin dáleldep sóıledi. Óıtkeni mal qoralary kádýilgi irgetassyz ornatylyp, qurylysqa qoldanylatyn aǵashtar aldyn ala órtke qarsy eritindimen sýǵarylady jáne keptiriledi. Olar osy ádispen syna arqyly tek mal oryndary ǵana emes, úıler men kottedjder turǵyzýdyń da Reseıde keńinen qoldanyla bastaǵanyn tilge tıek etti.