Oralda iri kólemde aqsha urlaǵan kúdikti ustaldy

ASTANA. KAZINFORM – Oral qalasynda polıtseıler iri kólemde aqsha urlady degen kúdikpen 35 jastaǵy er adamdy ustady.

Polıtsııa málimetinshe, kúdikti 6-20 sáýir aralyǵynda jábirlenýshimen tanystyǵyn paıdalanyp, onyń páterine erkin kirip, jatyn bólmeden aqshany jasyryn túrde alyp ketken.

– 45 jastaǵy oblys turǵynyna keltirilgen jalpy shyǵyn 1,6 mln teńgeden asty. Urlanǵan qarajattyń ishinde ulttyq jáne shetel valıýtasy bolǵan, – delingen habarlamada.

Jedel-izdestirý is-sharalary barysynda kúdikti anyqtalyp, ustaldy. Ol óz kinásin moıyndap, aqshany qaryzdaryn óteýge jumsaǵanyn aıtqan.

Atalǵan fakti boıynsha qylmystyq is qozǵalyp, sotqa deıingi tergep-tekserý júrgizilip jatyr.

Aıta keteıik, polıtsııa azamattardy jeke múliktiń saqtalýyna muqııat bolýǵa jáne kúmándi jaǵdaılarda quqyq qorǵaý organdaryna jedel habarlaýǵa shaqyrady.

Buǵan deıin 230 myń dollar urlaǵan kúdikti áıel Grekııadan elge ekstradıtsııalanǵany habarlandy.